Májilis osy sessııada 175 zań jobasyn maquldady - spıker N. Nyǵmatýlın
ASTANA. 25 jeltoqsan. QazAqparat - Búgin QR Parlamenti Májilisi 2013 jyldaǵy sońǵy otyrysyn ótkizdi. Bıylǵy jumysty qorytyndylaǵan palata spıkeri Nurlan Nyǵmatýlın depýtattardyń byltyrǵy sessııadan beri 175 zań jobasyn maquldaǵanyn atap ótti.
Spıkerdiń aıtýynsha, úshinshi sessııanyń basynda Parlament palatalarynyń eki birlesken otyrysy, Májilistiń 17 otyrysy ótken. Májilis Tóraǵasy aldaǵy 2014 - jyly da Elbasynyń «Qazaqstan - 2050» Strategııasyn júzege asyrýdy zańnamalyq qamtamasyz etýge basa nazar aýdarylatyndyǵyn atap ótti.
«Jalpy aıtatyn bolsaq, osy shaqyrylym jumysyn bastaǵan 2012 - jyldyń qańtar aıynan beri, Májilis depýtattary 175 zań jobasyn maquldady, onyń 153-ne Prezıdenttiń qoly qoıylyp, óz kúshine endi. Halyq qalaýlylarynyń ásirese, zańnamalyq bastamalar boıynsha aıryqsha belsendiliginiń arqasynda osy jyly depýtattardyń ózderi ázirlegen qujattar sany arta tústi. Máselen májilismender, 21 zań jobasyna bastamashy boldy, bul ótken jylmen salystyrǵanda 2 esege artyq kórsetkish», - dedi Tóraǵa.
Nurlan Nyǵmatýlın áriptesterin kele jatqan jańa jyl merekesimen quttyqtap, alda «Qazaqstan - 2050» Strategııasyn júzege asyrýǵa qatysty aýqymdy zańdyq jumystardy qolǵa alý mindeti turǵanyn tilge tıek etti.
