Májilis onomastıka máselelerine arnalǵan zań jobasyn eki oqylymda qarap, maquldady
ASTANA. 12 jeltoqsan. QazAqparat - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine onomastıka máseleleri boıynsha ózgerister men tolyqtyrýlar engizý týraly» zań jobasyn eki oqylymda talqylap, qujatty maquldady.
Endi atalǵan zań jobasy Senattyń qaraýyna joldanady.
El Táýelsizdiginiń alǵashqy jyldarynda eldiń belgili qaıratkerleriniń esimi laıyqty túrde este qaldyryldy. Fızıkalyq-geografııalyq nysandardyń, eldi mekenderdiń tarıhı ataýlary qalpyna keltirildi. Alaıda sońǵy jyldary jergilikti jerlerde túrli áleýmettik nysandarǵa esimi elge belgisiz tulǵalardyń attary berile bastady. Mundaı olqylyqtar ulttyq zańnamada kemshilikterdiń oryn alýy saldarynan týyndaǵan bolatyn. Osyǵan oraı, zań jobasyn qabyldaýdyń ózektiligi onomastıkalyq komıssııalarǵa ońtaıly jaǵdaılar jasaý jáne olardyń jumysyn retteý qajettiligine baılanysty bolyp tabylady.
«Táýelsizdik alǵannan beri kóptegen eldi mekenderdiń tarıhı ataýlary qaıtarylyp, kóp jaǵdaıda tarıhı shyndyq qaıta oralyp, onomastıka salasynda aýqymdy jumystar júrgizildi. Osy baǵyttaǵy jumysty odan ári jetildirý, júıeleý maqsatynda, sońǵy 5 jylda respýblıkada onomastıkalyq máselelerdi júrgizýge, nysandarǵa ataý berý men olardy qaıta ataýǵa ýaqytsha moratorıı jarııalanǵan bolatyn. Osy ýaqyt ishinde birqatar máseleler qordalanyp, nátıjesinde onomastıka salasynyń normatıvtik-quqyqtyq bazasyn jetildirý qajettiligi týyndap otyr», - deıdi zań jobasy boıynsha baıandaǵan QR Mádenıet jáne aqparat mınıstri Darhan Myńbaı.
Mınıstrdiń aıtýynsha, zań jobasy boıynsha onomastıka salasyndaǵy jumysty jetildirýge, eń aldymen, onomastıkalyq jumystardy júrgizgen kezde ashyqtyq qaǵıdattaryn engizý, qoǵamdyq pikirdi eskerý, sheshimderdi qabyldaý úderisinde azamattyq qoǵam ınstıtýttaryn keńinen tartý jáne barlyq deńgeıdegi onomastıkalyq komıssııalardyń quzyrettiligin naqty belgileý kózdeledi. Budan bólek, qujatta áleýmettik nysandarmen qatar respýblıkalyq mańyzy bar qalalardaǵy, astanadaǵy, oblystyq mańyzy bar qalalardaǵy kósheler, alańdar men skverler ataýlaryn tek Respýblıkalyq onomastıkalyq komıssııanyń kelisimi arqyly ǵana qaıta ataý máseleleriniń quqyqtyq tetikteri aıqyndalady.
