Májilis ónerkásiptik saıasat týraly zań jobasyn maquldady
NUR-SULTAN. QazAqparat – Májilistiń jalpy otyrysynda palata depýtattary «Ónerkásiptik saıasat týraly» zań jobasyn ekinshi oqylymda maquldady, dep habarlaıdy QazAqparat tilshisi.
Atalǵan zań jobasy 2021 jylǵy 6 qazanda birinshi oqylymda maquldandy.
Zań jobasy Memleket basshysynyń ótken jylǵy Qazaqstan halqyna Joldaýynda berilgen tapsyrmasyna sáıkes ázirlendi jáne óńdeýshi ónerkásipti damytýdyń negizgi qaǵıdattaryn, maqsattary men mindetterin aıqyndaıdy. Basty mindet - ónerkásiptiń áleýetin tolyq ashý.
Zań jobasymen jumys isteý barysynda depýtattar:
- «ónerkásiptiń tsıfrlyq transformatsııasy», «elishilik qundylyq» uǵymdaryn engizýge jáne «ónerkásipti memlekettik yntalandyrý sharalary», «óńdeý ónerkásibi», «ónerkásiptik-ınnovatsııalyq júıe» termınderin naqtylaýǵa;
- jergilikti atqarýshy organdardyń ónerkásiptik saıasatty iske asyrý boıynsha quzyretterin engizýge jáne ónerkásipti memlekettik yntalandyrý salasyndaǵy ýákiletti organnyń, sondaı-aq syrtqy saýda qyzmetin retteý jónindegi ýákiletti organnyń quzyretterin naqtylaýǵa;
- ónerkásiptik saıasattyń maqsaty men mindetterin jáne ónerkásipti memlekettik yntalandyrý sharttaryn naqtylaýǵa;
- elde ónerkásiptik saıasatty qalyptastyrýdyń negizgi quraly retinde Ónerkásiptiń jaı-kúıi týraly jyl saıynǵy ulttyq baıandamany qalyptastyrý jónindegi normalardy engizýge;
- óndirisi ulttyq ekonomıkanyń uzaq merzimdi básekege qabilettiligin jáne memlekettik yntalandyrý sharalaryn aıqyndaıtyn basym taýarlar tizbesine engizý úshin taýarlardy irikteý ólshemsharttaryn belgileýge;
- eńbek ónimdiligin arttyrýǵa jáne taýarlardy eksportqa ilgeriletýge baǵyttalýdy eskere otyryp, qarsy mindettemelerdi aıqyndaý kezinde zańdylyq, teńdik, transparenttilik jáne memleket pen bıznestiń ózara jaýaptylyǵy qaǵıdattaryn bekitýge baǵyttalǵan túzetýler engizdi.
Budan basqa, Qazaqstan Respýblıkasynyń qoldanystaǵy zańnamasyna jáne zań tehnıkasynyń talaptaryna sáıkes keltirý boıynsha, sondaı-aq zań jobasynyń jekelegen normalaryn naqtylaıtyn jáne mazmunyn jaqsartatyn túzetýler engizildi.
Jumys tobyna depýtattar men komıtetterdiń 475 usynysy kelip tústi, olar múddeli memlekettik organdar ókilderiniń, «Atameken» Ulttyq kásipkerler palatasy, óńdeý ónerkásibiniń kásiporyndary, sondaı-aq qoǵamdyq uıymdar ókilderiniń qatysýymen jumys tobynyń jıyrma toǵyz otyrysynda, Komıtettiń keńeıtilgen otyrystarynda talqylandy.
Sonymen qatar, jalpy otyrysta «Qazaqstan Respýblıkasynyń keıbir zańnamalyq aktilerine ónerkásiptik saıasat máseleleri boıynsha ózgerister men tolyqtyrýlar engizý týraly» ilespe zań jobasy da ekinshi oqylymda maquldandy.
