Májilis Olımpıada rámizin qorǵaý týraly Naırobı shartyn maquldady
ASTANA. Qyrkúıektiń 29-y. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Olımpıada rámizin qorǵaý týraly Naırobı shartyn ratıfıkatsııalaý týraly» zań jobasyn maquldady.
Naırobı shartyna sáıkes, buǵan qatysýshy kez kelgen memleket Halyqaralyq olımpıada komıtetiniń ruqsaty bolǵan kezden basqa jaǵdaılarda olımpıada rámizin kommertsııalyq maqsatta tańba nemese basqa belgi retinde paıdalanýǵa tıisti sharalar jolymen tıym salýǵa mindetti. Atap aıtqanda, qatysýshy memleketter Halyqaralyq olımpıada komıtetiniń jarǵysynda anyqtalǵan túrde, olımpıada rámizinen turatyn nemese osy rámizdi qamtıtyn kez kelgen belgini tańba retinde tirkeýden bas tartýǵa nemese onyń tirkelýin jaramsyz dep tanýǵa mindetti.
«Sportty damytý, ony nasıhattaý jáne olımpıada rezervin daıarlaý Qazaqstan úshin basty maqsat. Buǵan 2011 jyly elimizdiń qos qalasynda ótetin 7-i qysqy Azııa oıyndaryn uıymdastyrý jáne ótkizý aıqyn dálel. Zań jobasynda qamtylǵan olımpıada rámizin qorǵaý týraly Naırobı shartyn qabyldaý elimizdiń bedelin arttyrýǵa da oń yqpal etedi. Shart olımpıada rámizderin zańsyz paıdalanýdy boldyrmaıdy», - dedi QR Ádilet mınıstriniń orynbasary Ámirhan Amanbaev.
Onyń aıtýynsha, búgingi kúni atalǵan shartqa 47 memleket, onyń ishinde TMD-nyń Reseı, Belarýs, Ýkraına, Qyrǵyz jáne Tájikstan memleketteri qol qoıǵan. Májilis maquldaǵan qujat Parlament Senatyna joldanady.
