Májilis ókilettigin merziminen buryn toqtatyp, jańa saılaý taǵaıyndaý týraly QR Prezıdentiniń atyna Úndeýdi qabyldady
ASTANA. QazAqparat - Búgin Májilistiń jalpy otyrysynda palata depýtattary besinshi saılanǵan Parlamenttiń tómengi palatasyn taratý jáne jańa saılaýdy taǵaıyndaý týraly QR Prezıdentiniń atyna joldanǵan Úndeýdi biraýyzdan qabyldady.
Eske salaıyq, buǵan deıin Májilistiń birqatar depýtattary Májilisti taratyp, saılaýdy merziminen buryn ótkizý týraly bastama kótergen bolatyn. Osyǵan baılanysty, jalpy otyrystyń kún tártibine atalǵan másele engizilgen bolatyn. Elbasynyń atyna joldanǵan Úndeýdi Májilis depýtaty, «Nur Otan» partııasy fraktsııasynyń múshesi Nurlan Ábdirov oqyp berdi. Budan soń Májilistegi partııa fraktsııalary atynan sóz sóılegender bastamany tolyq qoldady.
«Májilistegi úsh partııanyń parlamenttik fraktsııasy basshylarymen ótkizgen konsýltatsııadan soń Qazaqstan halqy Assambleıasynan saılanǵan depýtattar da Parlamenttiń ózin ózi taratý jáne jańa saılaýdy taǵaıyndaý týraly bastamany qoldaý týraly sheshim qabyldady. Biz úshin aýqymy kún saıyn keńeıip bara jatqan jańa qaterler men qaýipter aldynda Qazaqstan halqynyń birligin nyǵaıtýdan basqa mańyzdy dúnıe joq. Biz bárimiz Elbasynyń tóńiregine toptasýymyz kerek. Al Májilistiń kezekten tys saılaýy búkil qazaqstandyq qoǵamnyń birigýi men jumylýyn odan saıyn berik ete túsedi. Osynyń ózi daǵdarysqa qarsy sharalardy, Elbasynyń ınstıýttyq reformalaryn saýatty ári tıimdi júrgizýge septigin tıgizbek», - dedi depýtat Roman Kım.
Jıynǵa qatysqan Májilistiń 103 depýtatynyń barlyǵy atalǵan bastamany biraýyzdan qoldap daýys berdi.
