Májilis Neke jáne otbasy týraly kodekstiń jobasyn úshinshi oqylymda maquldady

Kodeks jobasy neke jáne otbasy zańnamasyn jetildirý jáne ondaǵy olqylyqtardy joıý, sondaı-aq onyń normalaryn halyqaralyq standarttarǵa sáıkes keltirý qajettiligine baılanysty ázirlengen. Jańa Kodeks jobasy 279 baptan turady. Qujatta «erli-zaıyptylyq», «ákesin, ákeligin anyqtaý», «sýrrogat ana», «qosalqy reprodýktıvti ádister men tehnologııalar», «bala asyrap alý jónindegi agenttikter» degen uǵymdarǵa jańa aıqyndamalar berildi.

Sol sekildi joba otbasy men balanyń múddelerin qorǵaýǵa baǵyttalǵan birqatar jańa normalardy qamtyp otyr. Atap aıtqanda, bul normalar zańmen qorǵalatyn, azamattardyń jeke jáne otbasy ómiriniń qupııasyn kózdeıtin jaǵdaılarǵa sáıkes bolyp tabylady. Sondaı-aq jobada bala asyrap alý jónindegi taraý eleýli túrde qaıta óńdelip, onda asyrap alýshynyń quqyqtary men mindetteri jáne osy tártip bóligindegi jańa normalarmen tolyqtyryldy. Budan basqa, Qazaqstannyń óz ishinde bala asyrap alýdy yntalandyrý maqsatymen birqatar ózgerister qamtyldy. Máselen, jobada qorǵanshylarǵa (qamqorshylarǵa) ata-analarynyń qamqorlyǵynsyz qalǵan balany kútip-baǵýǵa arnalǵan járdemaqy taǵaıyndaý jáne tóleý tetigin ázirleý týraly usynystar kórinis tapty. Úshinshi oqylymǵa ázirleý barysynda depýtattar tarapynan qosymsha usynystar men eskertpeler sondaı-aq keıbir normalardy naqtylaý jáne zań tehnıkasyna sáıkes keltirý maqsatynda birqatar usynystar jasalǵan.

Májilis maquldaǵan zań jobasy Parlament Senatyna jiberiledi.