Májilis Nahchyvan kelisimin maquldady
ASTANA. Qyrkúıektiń 2-si. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Túrki tildes memleketterdiń yntymaqtastyq keńesin qurý týraly Nahchyvan kelisimin ratıfıkatsııalaý týraly» zań jobasyn maquldady.
«Jaqyn etnıkalyq negizderdi, til men din, uqsas mádenıet pen dástúrlerdi negizge ala otyryp, Qazaqstannyń syrtqy saıasatynyń basymdy baǵyttarynyń biri - túrki tildes memlekettermen yntymaqtastyq bolyp tabylady. Túrki tildes memleketterdiń yntymaqtastyǵy Qazaqstannyń syrtqy saıasaty qaǵıdattaryna sáıkes mańyzdy saıası qoldaý resýrsyn beredi. Bundaı yntymaqtastyq jalpy, 1992 jyly qurylǵan Túrki tildes memleketterdiń sammıti aıasynda júzege asyp keledi. Budan bólek, osy baǵytta birqatar túrki tildes elderiniń yntymaqtastyǵyn qamtıtyn ınstıtýttar da qyzmet etedi. Alaıda, yntymaqtastyq úderisi osy memleketter basshylary deńgeıinde jalpy saıası qurylymdy qurý qajettigin kórsetti. Osyǵan oraı, Qazaqstan Prezıdenti N. Nazarbaev Túrki tildes memleketter keńesin qurý týraly bastama kótergen bolatyn. Osyǵan oraı, Nahchyvan qalasynda ótken Túrki tildes memleketteriniń 9-shy sammıtinde osy keńesti qurý týraly kelisim jasaldy», dedi zań jobasy boıynsha baıandaǵan QR Syrtqy ister mınıstriniń orynbasary Nurlan Ermekbaev.
Toqtala ketetin jaıt, Elbasy usynǵan osy kelisimdi Ázirbaıjan men Túrkııa memleketteri qabyldaǵan. Al qujatqa sáıkes, úshinshi memleket qabyldaǵannan keıin kelisim birden kúshine ene beredi.
Májilis maquldaǵan zań jobasy Parlament Senatyna jiberiledi.
