Májilis munaı ónimderiniń aınalymyna memlekettik baqylaýdy kúsheıtý týraly zań jobasyna Senat engizgen kelisimderdi qabyldady
ASTANA. Qyrkúıektiń 15-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respblıkasynyń keıbir zańnamalyq aktilerine munaı jáne munaı ónimderiniń aınalymy salasynda memlekettik baqylaýdy kúsheıtý máseleleri boıynsha ózgerister men tolyqtyrýlar engizý týraly» zań jobasyna Parlament Senaty engizgen ózgeristerdi talqylady.
Esterińizge sala keteıik, atalǵan zań jobasyna Parlament Májilisiniń bir top depýtattary bastamashylyq jasaǵan bolatyn. Zań jobasynyń negizgi maqsaty jelilik munaı qubyrlaryna sanktsııalanbaǵan oıyqtar ornatý jolymen júzege asyrylatyn munaı urlaýǵa qarsy kúres sharalaryn júzege asyrý bolyp tabylady. Mundaı urlyq tásili qubyr júıesiniń qaýipsizdigine, eldiń, munaı jáne munaı-kólik kompanııalarynyń ekonomıkalyq múddelerine eleýli qater tóndiredi. Munaıdyń jer ústine tógilýi saldarynan qorshaǵan ortaǵa orny tolmas zııan keltiriledi.
Budan bólek mundaı urlyq munaıdyń eksporttyq jetkiziliminiń turaqtylyǵyn buzýǵa jaǵdaı jasaıdy. Energııa resýrstaryn senimdi berýshi retindegi Qazaqstannyń iskerlik bedeline zııan keltiredi. Sonymen birge, qazaqstandyq jobalarǵa qatysatyn sheteldik kompanııalardyń alańdaýshylyǵyn týǵyzýǵa ákep soǵady.
Parlament Senaty Májilis maquldaǵan zań jobasyna tujyrymdyq erejelerin ózgertpeıtin barlyǵy 12 túzetý engizgen bolatyn. Sondyqtan da, Májilis depýtattary senatorlar usynǵan túzetýlerge kelisim berdi.
