Májilis munaı ónimderiniń aınalymyn memlekettik baqylaýǵa arnalǵan zań jobasyn maquldady
amyrdyń 19-y. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respblıkasynyń keıbir zańnamalyq aktilerine munaı jáne munaı ónimderiniń aınalymy salasynda memlekettik baqylaýdy kúsheıtý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady,
dep habarlaıdy QazAqparat.
Esterińizge sala keteıik, atalǵan zań jobasyna Parlament Májilisiniń bir top depýtattary bastamashylyq jasaǵan bolatyn. Zań jobasynyń negizgi maqsaty jelilik munaı qubyrlaryna sanktsııalanbaǵan oıyqtar ornatý jolymen júzege asyrylatyn munaı urlaýǵa qarsy kúres sharalaryn júzege asyrý bolyp tabylady. Mundaı urlyq tásili qubyr júıesiniń qaýipsizdigine, eldiń, munaı jáne munaı-kólik kompanııalarynyń ekonomıkalyq múddelerine eleýli qater tóndiredi. Munaıdyń jer ústine tógilýi saldarynan qorshaǵan ortaǵa orny tolmas zııan keltiriledi.
Budan bólek mundaı urlyq munaıdyń eksporttyq jetkiziliminiń turaqtylyǵyn buzýǵa jaǵdaı jasaıdy. Energııa resýrstaryn senimdi berýshi retindegi Qazaqstannyń iskerlik bedeline zııan keltiredi. Sonymen birge, qazaqstandyq jobalarǵa qatysatyn sheteldik kompanııalardyń alańdaýshylyǵyn týǵyzýǵa ákep soǵady.
Qujatty ekinshi oqylymǵa ázirleý barysynda palata depýtattary zań jobasynyń jekelegen normalaryn jetildirýge, onyń erejelerin basqa zańdarǵa sáıkes keltirýge, sondaı-aq jobanyń mazmunyn jaqsartýǵa baǵyttalǵan birqatar ózgerister engizgen.
Májilis maquldaǵan zań jobasy Parlament Senatyna jiberiledi.
