Májilis múmkindigi shekteýli adamdardyń quqyqtaryn qamtamasyz etýge qatysty qujatty maquldady

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine azamattardyń jekelegen sanattaryn áleýmettik qorǵaý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

Atalǵan zań jobasy Qazaqstan Respýblıkasynda múmkindigi shekteýli adamdardyń quqyqtaryn qamtamasyz etý jáne turmys sapasyn jaqsartý jónindegi 2025 jylǵa deıingi ulttyq jospardy oryndaý aıasynda ázirlengen.

«Zań jobasy múgedektigi bar adamdardyń, múmkindigi shekteýli balalardy tárbıelep otyrǵan otbasylar, eńbek ardagerleri jáne basqa da sanattardy qosa alǵanda, azamattardyń jekelegen sanattaryn áleýmettik qorǵaý máseleleri jónindegi zańnamany jetildirý maqsatynda ázirlendi. Bul normalardy «Nur Otan» partııasy qoldaǵanyn jáne saılaýaldy tuǵyrnamada kórinis tapqanyn atap ótý qajet», – dedi mınıstr.

Negizgi tujyrymdamalyq jańalyqtarǵa toqtalsaq, qujatta sebebine qaramastan, I toptaǵy múgedektigi bar adamdarǵa kútim kórsetýshilerge jańa járdemaqy túrin engizý qaralǵan. Qazirgi ýaqytta I toptaǵy 66 myń múmkindigi shekteýli jannyń arasynan árbir úshinshisi kútimi boıynsha járdemaqymen de, jeke kómekshiniń qyzmetimen de qamtylmaǵan. ıAǵnı basqa adamnyń kómegine zárý, óz betimen júrip-tura almaıtyn múgedek jandar. Osy oraıda zań jobasyn qabyldaý nátıjesinde syrtqy qamqorlyqqa muqtaj 24 myń adam qosymsha kútim boıynsha járdemaqymen qamtylady.

«Qazirgi ýaqytta járdemaqyny engizý boıynsha daıyndyq jumystary júrgizilýde», - dedi mınıstr.

Budan bólek, bala densaýlyǵynyń buzylý dárejesin jáne tynys-tirshilik áreketiniń shektelýin eskere otyryp, zań jobasynda 7 jastan 16 jasqa deıingi balalardy múgedektik toptary boıynsha bólý kózdeledi. Bul shara balalar aýrýynyń dárejesine qaraı ońaltý is-sharalary men áleýmettik kómekti, onyń ishinde járdemaqylar mólsheri bóliginde saralaýǵa múmkindik beredi. Bul rette múgedektigi bar balalardyń barlyq toptary úshin járdemaqy mólsheri 16,7 paıyzdan 37 paıyzǵa deıin ulǵaıtylady. Bul shara 30 myńnan astam múmkindigi shekteýli balaǵa qatysty bolady.

Budan buryn habarlanǵandaı, Qujatta múgedektigi bar balany tárbıelep otyrǵan otbasylarǵa bala kámelettik jasqa tolǵannan keıin de turǵyn úı kezeginde turý quqyǵyn saqtaý kózdeledi.

I toptaǵy múgedektigi bar adamdarǵa kútim kórsetýshilerge jańa járdemaqy túri engiziledi.