Májilis múlikti jarııalaýǵa raqymshylyq týraly zań jobasyn birinshi oqylymda maquldady
ASTANA. QazAqparat - Búgin Parlament Májilisi «Qazaqstan Respýblıkasynyń azamattaryna, oralmandarǵa jáne Qazaqstan Respýblıkasynda turýǵa yqtııarhaty bar tulǵalarǵa olardyń múlikti jarııa etýine baılanysty raqymshylyq jasaý týraly» zań jobasyn maquldady.
Eske salaıyq, qujat Memleket basshysy N. Nazarbaevtyń tapsyrmasy boıynsha ázirlengen.
Qujatqa sákes, jarııa etý nysandaryna baǵaly qaǵazdar, zańdy tulǵanyń jarǵylyq kapıtalyndaǵy qatysý úlesteri, qurylys normalary men qaǵıdalaryna sáıkes keletin qurylystar men ǵımarattar, tıesili emes tulǵaǵa rásimdelgen qurylystar, sonymen qatar, Qazaqstannan tysqary aýmaqtardaǵy jyljymaıtyn múlikter jatady. «Degenmen, jekelegen qylmystardy jasaý nátıjesinde alynǵan múlikter jarııa etýge (zańdastyrýǵa) jatpaıdy. Máselen, jeke adamǵa qarsy jáne adamnyń konstıtýtsııalyq jáne basqa da quqyqtary men bostandyqtaryn buza otyryp alynǵan múlikter, konstıtýtsııalyq qurylym men memlekettik qaýipsizdikke qarsy qylmystyq jolmen alynǵan kirister, sondaı-aq sybaılas jemqorlyq jáne basqa da quqyq buzýshylyq pen memlekettik qyzmet múddesine qaıshy qylmystar jasaý boıynsha alynǵan múlikter raqymshylyqqa jatpaıdy», - deıdi QR Premer-Mınıstriniń orynbasary - Qarjy mınıstri Baqyt Sultanov.
Onyń aıtýynsha, jarııa etý negizinen eldiń ekonomıkalyq aınalymyna qosymsha qarjy qarajaty men múlikterdi tartý maqsatyn kózdeıdi. Bul rette zańdastyrylǵan qarajat pen múlikter salyq salý maqsattary úshin tabys retinde qarastyrylmaıdy, soǵan sáıkes olarǵa tabys salyǵy da salynbaıtyn bolady. Budan bólek, jarııa etilgen múlik sýbektileri qylmystyq jáne ákimshilik jaýapkershilikten bosatylady.
Sonymen qatar, zań jobasymen jarııa etýdiń tetikteri men quraldary da aıqyndalyp otyr. Atap aıtqanda, qarajat pen múlikke raqymshylyq boıynsha birinshiden jarııa etilgen qarajattardy ekinshi deńgeıli bankterden ashylǵan arnaıy jınaq shottaryna aýdarýǵa bolady. Atalǵan qarajatty onyń ıeleri ekinshi deńgeıli bankterde ashylǵan joǵaryda aıtyp ótken shottarda bes jyl boıy saqtaýǵa jáne sol arqyly naryqtyq stavkalarǵa sáıkes, syıaqylar ala alady.
«Ekinshiden, qarajatty merziminen buryn paıdalanýdy kózdeıtinder memlekettik baǵaly qaǵazdardy, ekinshi deńgeıli bankterdegi, ulttyq basqarýshy holdıngter men damý ınstıtýttarynyń oblıgatsııalaryn, «Halyqtyq ІRO» baǵdarlamasy aıasynda satylatyn jáne Qazaqstan qor naryǵyna shyǵarylatyn baǵaly qaǵazdar men aktsııalardy ıelený jolymen ekonomıkaǵa tikeleı ınvestıtsııalaı alady», - deıdi B. Sultanov.
Budan bólek, raqymshylyq arqyly zańdastyrǵan qarajattardy jekeshelendirýdiń ekinshi tolqyny aıasyndaǵy nysandardy satyp alýǵa jumsaýǵa da múmkindik týady.
«Eger azamattar ózderiniń raqymshylyq aıasynda zańdastyrǵan qarajattaryn joǵarydaǵy ınvestıtsııalaý mehanızmderine paıdalanǵysy kelmese, onda olar óz qarajatyn qalaýynsha jumsaı alady. Degenmen, olarǵa osyndaı qarajatty tóleý barysynda ekinshi deńgeıli bankter jarııa etiletin qarajattyń jalpy somasynan 10 paıyzy mólsherin ustap qalatyn bolady», - deıdi mınıstr.
Toqtala ketetin jaıt, buǵan deıin de belgili bolǵanyndaı, múlikterdi jarııa etý merzimi 2014 jylǵy 1 qyrkúıekten 2015 jylǵy 31 jeltoqsan aralyǵynda aıqyndalǵan bolatyn.
