Májilis múgedektik belgisi boıynsha kez kelgen kemsitýshilikke tyıym salatyn konventsııany maquldady
ASTANA. QazAqparat - Búgin Parlament Májilisiniń jalpy otyrysynda palata depýtattary «Múgedekterdiń quqyqtary týraly konventsııany ratıfıkatsııalaý týraly» zań jobasy maquldandy.
Atalǵan konventsııany BUU Bas Assambleıasy 2006 jyly 13 jeltoqsanda qabyldaǵan bolatyn. Qazirgi ýaqytta konventsııaǵa 151 memleket, sonyń ishinde TMD-nyń Estonııa, Reseı, Ázerbaıjan, Armenııa sekildi elderi ratıfıkatsııalaǵan.
«Konventsııa múgedekter quqyqtaryn qorǵaýǵa, múmkindiginiń shektelýine baılanysty kemsitýshilikti joıýǵa, múgedekterdiń qoǵamdyq ómirge tolyqtaı qatysýyn qamtamasyz etýge baǵyttalady. Bul rette qatysýshy memelketter múgedekterdiń jetkilikti deńgeıde ómir súrýin qamtamasyz etý jáne olardyń áleýmettik qorǵalýy úshin tıisti sharalardyń barlyǵyn qabyldaýǵa tıis. Atap aıtqanda, múgedekterge kólikke, aqparat pen baılanysqa, sondaı-aq halyq úshin ashyq nysandarǵa nemese usynylatyn qyzmetterge basqa adamdarmen teńdeı qol jetkizýge kepildik beredi», - dedi Densaýlyq saqtaý jáne áleýmettik damý vıtse-mınıstri Svetlana Jaqypova.
Onyń aıtýynsha, qazirgi ýaqytta Qazaqstanda konventsııany ratıfıkatsııalaýǵa qoıylatyn sharattardy ázirleý jumysy qolǵa alynǵan. Muny tıimdi uıymdastyrý maqsatynda elimizdegi múgedekterdiń quqyqtaryn qamtamsyz etý jáne ómir súrý sapasyn jaqsartý jóninde 2012-2018 jyldarǵa arnalǵan is-sharalar jospary kezeń-kezeńin iske asyrylýda.
Jalpy, Konventsııa múgedekterdiń qoǵamnyń azamattyq, saıası, ekonomıkalyq, áleýmettik jáne mádenı ómirine qatysýyn qamtamasyz etýge, múgedektik belgisi boıynsha kemsitýshilikti joıýǵa, sondaı-aq múmkindikteri shekteýli adamdardyń quqyqtaryn qamtamasyz etýdiń tıimdi quqyqtyq tetikterin jasaýǵa baǵyttalǵan. Budan bólek, konventsııaǵa qatysýshy memleketter múgedektik belgisi boıynsha kez kelgen kemsitýshilikke tyıym salady jáne múgedekterdiń kez kelgen negizdegi kemsitýshilikten teń ári tıimdi quqyqtyq qorǵalýyna kepildik beredi.
