Májilis mindetti jáne ózara saqtandyrý máseleleri jónindegi zań jobasy boıynsha kelisim komıssııasynyń usynystaryn qabyldady
ASTANA. Jeltoqsannyń 23-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine mindetti jáne ózara saqtandyrý, salyq salý máseleleri boıynsha ózgerister men tolyqtyrýlar engizý týraly» zań jobasy boıynsha qos palata arasynda kelispeýshilikterdi eńserý jónindegi kelisim komıssııasynyń usynystaryn talqylady. Náıjesinde palata depýtattary komıssııa usynystaryn qoldap, qujatty qabyldady,
dep habarlaıdy QazAqparat.
Esterińizge sala keteıik, bul zań jobasynyń maqsaty saqtandyrýdyń mindetti túrlerin qarastyratyn zańnamalyq aktilerdiń jekelegen erejelerin naqtylaý men retteýge baǵyttalady. Budan basqa qujatpen ózara saqtandyrý qoǵamdaryn damytýdy odan ári yntalandyrý, saqtandyrý qyzmetterin tutynýshylardyń múliktik jáne áleýmettik múddeleriniń quqyqtyq qorǵalýyn qamtamasyz etý, sondaı-aq salyq ákimshiligin júrgizýdi jetildirý sharalary kózdeledi. Atap aıtqanda, qyzmetkerlerdiń ómiri men densaýlyǵyna keltirgen zııan úshin jumys berýshiniń azamattyq-quqyqtyq jaýapkershiligin mindetti saqtandyrý jónindegi fýnktsııany ómirdi saqtandyrý jónindegi saqtandyrý uıymdaryna berý kózdeledi.
Qos palata arasyndaǵy kelisim komıssııasy 56 ustanym boıynsha kelispeýshilikterdi qarap shyqty. Komıssııa sheshimi boıynsha bunyń 3-eýi Májilistiń redaktsııasynda, 9-y Senattyń, al qalǵan ustanymdar birlesken redaktsııada qabyldandy.
