Májilis memlekettik josparlaý júıesin jetildirýge baǵyttalǵan qujatty maquldady
ASTANA. 13 aqpan. QazAqparat - Búgin Parlament Májilisinde «Qazaqstan Respýblıkasynyń keıbir zańnamalyq aktilerine olardy Qazaqstan Respýblıkasynyń memlekettik josparlaý júıesimen sáıkestendirý máseleleri boıynsha ózgerister engizý týraly» zań jobasy birinshi oqylymda maquldandy.
Zań jobasynyń basty maqsaty memlekettik josparlaý salasynda strategııalyq jáne baǵdarlamalyq qujattardy ázirleý, iske asyrý jáne ońtaılandyrý úshin biryńǵaı quqyqtyq jaǵdaılardy qamtamasyz etý bolyp tabylady.
Ekonomıka jáne bıýdjettik josparlaý mınıstri Erbolat Dosaevtyń aıtýynsha, búgingi tańda memlekettik josparlaý júıesi birqatar qujattardan turady. Atap aıtqanda, olar: Qazaqstannyń 2050 jylǵa deıingi Damý strategııasy, Qazaqstan Respýblıkasynyń 2020 jylǵa arnalǵan damý jospary, elimizdiń aýmaqtyq keńistigi damýynyń boljamdy shemasy, Ulttyq qaýipsizdik strategııasy, basqa da memlekettik baǵdarlamalar, sondaı-aq áleýmettik-ekonomıkalyq damý boljamdary, aýmaqtardaǵy damytý strategııasy, salalyq baǵdarlamalar men respýblıkalyq jáne jergilikti bıýdjet jáne t.b.
«Memlekettik josparlaý júıesiniń negizgi qaǵıdaty biryńǵaı memlekettik josparlaý salasyndaǵy zańnamalyq birtutastyq bolyp tabylady. Sonymen qatar, tájirıbe barysynda qoldanystaǵy zańnamadaǵy memlekettik josparlaý júıesine sáıkes kelmeıtin, keıbir jaǵdaılarda tipti qaıshy keletin normalardyń bar ekeni anyqtaldy. Atap aıtqanda, keıbir zańnamalarda qandaı da bir máseleler boıynsha jalpy memlekettik, óńirlik, respýblıkalyq sektoraralyq jáne basqa baǵdarlamalar ázirleý qarastyrylǵan. Osyǵan oraı, Elbasy qoldanystaǵy zańnamalardan memlekettik organdardy strategııalyq jáne baǵdarlamalyq qujattardy ázirleýge mindetteıtin normalardy alyp tastaýdy tapsyrǵan bolatyn. Osy maqsatta mınıstrlik barlyq zańnamalyq aktiler men strategııalyq jáne baǵdarlamalyq qujattardy ázirleýge tikeleı jáne janama normalardyń bolýyna taldaý júrgizdi», - deıdi mınıstr E. Dosaev.
Onyń aıtýynsha, zań jobasymen keıbir zańnamalyq aktilerdi memlekettik josparlaý júıesine sáıkestendirý múmkindigi kózdelgen.
