Májilis memlekettik jastar saıasaty máseleleri týraly zań jobasyn qaraıdy

ASTANA. QazAqparat - Májilis Spıkeri Erlan Qoshanovtyń tóraǵalyǵymen Palatanyń bıýro otyrysy ótip, onda aldaǵy jalpy otyrystyń kún tártibi naqtylandy, dep habarlaıdy QazAqparat.

Bıýro otyrysynda depýtattarǵa Memleket basshysynyń jekelegen tapsyrmalaryn iske asyrý máseleleri boıynsha ózgerister men tolyqtyrýlar engizý týraly jáne memlekettik jastar saıasaty máseleleri boıynsha túzetýler engizý týraly zań jobalaryn birinshi oqylymda qaraý usynyldy.

Jıynda Májilis depýtattary Eýrazııalyq ekonomıkalyq odaq týraly shartqa Reseı azamattary bolyp tabylatyn Eýrazııalyq ekonomıkalyq komıssııasynyń jáne Eýrazııalyq ekonomıkalyq odaq sotynyń laýazymdy adamdary men qyzmetkerlerin zeınetaqymen qamsyzdandyrý bóliginde ózgerister engizý týraly hattamany ratıfıkatsııalaý týraly zań jobasyn qarady.

Sonymen qatar Májilis Konstıtýtsııalyq zań jobalaryn ekinshi oqylymda qaraıtyn bolady. Olar: Konstıtýtsııalyq Sot, Adam quqyqtary jónindegi ýákil, Prokýratýra, Memleket basshysynyń 2022 jylǵy 16 naýryzdaǵy Joldaýyn iske asyrý máseleleri boıynsha ózgerister men tolyqtyrýlar engizý týraly zań jobalary. Bıýro otyrysynda keıbir zańnamalyq aktilerge Memleket basshysynyń (2022 jylǵy 16 naýryzdaǵy) Joldaýyn iske asyrý máseleleri boıynsha túzetýler engizý jáne Ákimshilik quqyq buzýshylyq týraly kodekske ózgerister men tolyqtyrýlar engizý týraly zań jobalaryn ekinshi oqylymda qaraý usynyldy.

Sondaı-aq depýtattar Qylmystyq, Qylmystyq-protsestik jáne Qylmystyq-atqarý kodeksterine qylmystyq sot tóreligi, jazany oryndaý jáne azaptaý men qatygez áreketterdiń aldyn alý salasyndaǵy adam quqyqtary máseleleri boıynsha ózgerister men tolyqtyrýlar engizý týraly jáne Qazaqstan men Halyqaralyq Qaıta Qurý jáne Damý Banki arasyndaǵy Qaryz týraly kelisimdi ratıfıkatsııalaý týraly zań jobalaryn jumysqa alýdy kózdep otyr.