Májilis memlekettik statıstıka týraly zań jobasyna Senat engizgen túzetýlermen kelisti
ASTANA. Aqpannyń 17-si. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýattary «Memlekettik statıstıka týraly» zań jobasyna QR Parlamenti Senatynyń engizgen túzetýlerin talqylap, qujatty qabyldady,
dep habarlaıdy QazAqparat.
Atalǵan zań jobasynyń negizgi maqsaty respondentterdiń júktemesin azaıtý jáne statıstıkalyq aqparatty paıdalanýshylardyń senim deńgeıin, statıstıkalyq aqparattyń búkpesiz ashyqtyǵyn arttyrý bolyp tabylady. Sonymen birge, qujatta memlekettik organdardyń, respondentterdiń jáne memlekettik statıstıkany paıdalanýshylardyń quqyqtary men mindetterin tıimdi bólý, respondentter beretin bastapqy statıstıkalyq derekterdiń qupııalylyǵyn qamtamasyz etý sharalary qarastyrylyp otyr.
Budan basqa, zań jobasy halyqtyń, bıznestiń, memlekettik organdardyń jáne halyqaralyq uıymdardyń sapaly statıstıkalyq aqparatqa degen suranysyn qanaǵattandyrýǵa baǵyttalady. Qujat statıstıkalyq jáne statıstıkalyq emes qyzmetterdiń arajigin ajyratýdy kózdeıdi. Bul rette statıstıkalyq qyzmetti - statıstıkalyq jumystar josparynyń sheginde ýákiletti organ men memlekettik organdar jáne Ulttyq bank júzege asyrady. Al statıstıkalyq emes qyzmetti strategııalyq retteýshi, iske asyrýshy fýnktsııalaryn júrgizý aıasyndaǵy memlekettik organdar júzege asyrady. Zań jobasynda barlyq memlekettik organdardyń eseptiligi retteý sharalary da kózdelip otyr. Jalpy qujat BUU-nyń resmı statıstıkanyń negizgi qaǵıdattaryn ornyqtyrýǵa baǵyttalyp, halyqaralyq talaptarǵa sáıkestigin arttyrady.
Joǵarǵy palata zań jobasyna 8 túzetý engizgen bolatyn. Bulardyń barshasy redaktsııalyq naqtylaý sıpatynda ári qujattyń tujyrymdamasyn ózgertpeıtin bolyp otyr. Osyǵan oraı, Májilis Senat tarapy usynǵan túzetýlerge kelisimin bildirdi. Endi qujat Memleket basshysynyń qol qoıýyna joldanady.
