Májilis memlekettik shekara qaýipsizdigine qatysty qujatty maquldady

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń Memlekettik shekarasy týraly» QR Zańyna ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

Zań jobasy Qazaqstannyń Memlekettik shekarasy týraly zańnamany jetildirý maqsatynda ázirlendi.

«Zań jobasynda Qazaqstan Respýblıkasynyń Memlekettik shekara týraly zańnamasyn buzýdyń yqtımal táýekelderin tómendetýge baǵyttalǵan normalar usynyldy. Osylaıshy, jolaýshylardy túsirýdi (otyrǵyzýdy), júkter men taýarlardy tıeýdi júzege asyrmaıtyn jaǵdaıda ǵana, Qazaqstan aýmaǵyn tranzıt túrde temirjol kóligimen ótýde shekaralyq, kedendik jáne baqylaýdyń ózge de túrlerin júrgizbeý usynylady», - dedi Májilis depýtaty Qudaıbergen Erjan.

Sonymen qatar, qujatta QR Ulttyq qaýipsizdik komıteti Shekara qyzmetiniń qajetti ınjenerlik-tehnıkalyq quraldardy, qurylystar men bógeýishterdi ornatý jónindegi quzyreti naqtylanady.

«Zań jobasynda Shekara qyzmetimen pılotsyz ushý apparattaryn qoldanýdyń erejesin bekitý boıynsha Ulttyq qaýipsizdik komıtetiniń quzyreti qarastyralady. Munymen qosa, shekara keńistiginde quqyq buzýshylyqtardyń jolyn kesý kezinde UQK Shekara qyzmeti alǵan janýarlardy, balyqtardy jáne ósimdikterdi, brakonerlik aýlaý quraldaryn, brakonerlik júzý jabdyqtaryn esepke alý, saqtaý men baǵalaý jáne odan ári paıdalaný jónindegi jumysty uıymdastyrý quziretin jergilikti atqarý organdaryna berýdi qarastyrady», - dedi Q. Erjan.