Májilis memlekettik satyp alý rásimderin jeńildetýge baǵyttalǵan zań jobasyn maquldady
ASTANA. QazAqparat - Búgin Májilistiń jalpy otyrysynda palata depýtattary «Memlekettik satyp alýlar týraly» zań jobasyn ekinshi oqylymda maquldady. Májilis maquldaǵan qujat endi Senattyń talqylaýyna joldanady.
Aıta keterligi, zań jobasynyń negizgi maqsaty memlekettik satyp alýlar erejesin jeńildetip, sybaılas jemqorlyq táýekelderin azaıtýdy qarastyrady. Sonymen qatar, qujatta yqtımal taýar jetkizýshilerdiń quqyqtary men zańdy múddelerin qorǵaý jáne memlekettik satyp alýǵa qatysatyn taraptardyń jaýapkershiligin arttyrý sharalary kózdelip otyr.
Májilis depýtaty Serikjan Qanaevtyń aıtýynsha, zań jobasymen memlekettik satyp alýdy ótkizý rásimderin jeńildetý sheńberinde aldyn ala biliktilik irikteýdi qoldana otyryp konkýrsty engizý, sondaı-aq konkýrs pen aýktsıondy ótkizý tártibin jeńildetý kózdelgen.
«Sybaılas jemqorlyq kórinisterin bolǵyzbaý maqsatynda zań jobasymen tehnıkalyq ózindik erekshelikterdi aldyn ala talqylaý ınstıtýty engiziledi. Konkýrstan tys rásimderge qoıylatyn talaptar kóteriledi, sharttar jasasýdyń, taýarlardy berý týraly elektrondyq júkqujattardyń, oryndalǵan jumystar men qyzmetter kórsetý aktileriniń jáne elektrondyq shot-faktýralardyń tek qana elektrondyq formaty engiziledi. Memlekettik satyp alý qorytyndylaryna shaǵym jasaý merzimderi belgilenip, sol ýaqyt aralyǵynda sharttar jasasýǵa jol berilmeıdi», - dedi depýtat Serikjan Qanaev.
Budan bólek, zań jobasynda tapsyrys berýshiniń ne ónim berýshiniń memlekettik satyp alý týraly shart boıynsha mindettemelerdi oryndamaǵany úshin aıyppul sanktsııalary da belgilengen.
