Májilis memlekettik organdardyń qupııa hattaryn tasýǵa qatysty qujatty maquldady
NUR-SULTAN. QazAqparat – Parlament Májilisiniń jalpy otyrysynda «Memlekettik feldegerlik baılanys týraly» zań jobasy birinshi oqylymda maquldandy, dep habarlaıdy QazAqparat tilshisi.
«Feldegerlik qyzmetti uıymdastyratyn quzyrly organ – Premer-Mınıstrdiń keńsesi. Bul qyzmettiń mindeti – Úkimettiń hat almasý jumysyn qamtamasyz etý, memlekettik organdardyń asa mańyzdy ári qupııa hattaryn tasý, arnaıy poshtalardy TMD-ǵa múshe elderge jetkizý», - dedi QR Іshki ister mınıstri Erlan Turǵymbaev.
Onyń aıtýynsha, bul bólimniń qyzmetkerleri ishki ister organdarynyń kadrynda tirkelgen. Sondyqtan olar qarýmen, formamen jáne arnaıy quraldarmen qamtamasyz etiledi. Biraq ishki ister organdarynyń qyzmetkerleri sııaqty qylmys ashyp, tergeý júrgizbeıdi.
Zań jobasyn daıarlaý kezinde halyqaralyq tájirıbe zertteldi. Birqatar elde feldegerlik baılanys týraly arnaıy zań qabyldanǵan. Biz daıyndaǵan zań jobasynyń maqsaty - feldegerlik qyzmettiń quqyqtyq mártebesin bekitý.
Zań jobasynyń negizgi erejeleri:
1) feldegerlik baılanystyń mindetteri men qaǵıdattaryn zańnamalyq bekitýge;
2) Memlekettik feldegerlik qyzmet (MFQ) qyzmetkerleriniń quqyqtary men mindetterin aıqyndaýǵa;
3) MFQ qyzmetkerleriniń quqyqtyq jaǵdaıyn reglamentteýge;
4) MFQ qyzmetkerleriniń áleýmettik kepildikterin belgileýge baǵyttaldy.
Sonymen qatar Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik feldegerlik baılanys jáne ishki ister organdary qyzmetiniń máseleleri boıynsha ózgerister men tolyqtyrýlar engizý týraly» ilespe zań jobasy da birinshi oqylymda maquldandy.
