Májilis memlekettik múlik týraly zań jobasyn birinshi oqylymda maquldady
QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Memlekettik múlik týraly» zań jobasyn birinshi oqylymda maquldady,
dep habarlaıdy QazAqparat.
Atalǵan zań jobasynyń basty maqsaty memlekettik múlikke memlekettik quqyqty júzege asyrý úderisinde qalyptasqan qatynastardy retteıtin memlekettik múlikti basqarýdyń quqyqtyq negizderin, qaǵıdattary men erejelerin aıqyndaıtyn zańnamalyq bazany jetildirý bolyp tabylady. Bul rette Memleket basshysy óz Joldaýynda osy zamanǵy ekonomıkalyq jaǵdaıda ózgerip otyrǵan memlekettiń rólin memlekettik aktıvterdi tıimdi basqarý problemalaryna jańa turǵydan qaraý qajettigin aıtqan bolatyn. Bulardy zańnama normasyna aınadyrý qajettigin, sonyń ishinde memlekettik aktıvterdi basqarý týraly bólek zańnyń bolýy tıistigin alǵa tartqan edi.
«Atalǵan zań jobasy jeke menshik pen memlekettik menshiktiń teń bolý qaǵıdaty saqtalǵan jaǵdaıda memlekettik basqarýshy tujyrymdamasyna negizdelgen. Zań jobasyn ázirleý barysynda biz aldymyzǵa negizgi úsh maqsatty belgiledik. Bular birinshiden - memlekettik menshiktiń jáne ózge de quqyqtardyń ıesi retinde memlekettik múlikke quqyqtardy tıimdi júzege asyrýdy qamtamasyz etý. Ekinshiden - memlekettik múlikti basqarýdy júzege asyratyn memlekettik organdar quziretiniń arajigin ajyratý jáne memlekettik organdar men olardyń basshylaryn memlekettik múlikti basqarý salasyndaǵy memlekettik saıasatty júrgizýdegi jaýapkershiligin arttyrý. Úshinshiden - ulttyq holdıngter men ulttyq kompanııalar arqyly memlekettik múlikti korporatıvtik basqarýdyń quqyqtyq negizderin, olardyń memlekettik organdarmen naqty qarym- qatynasyn qamtamasyz etýge jaýapkershiligin belgileý», dedi qujat boıynsha baıandaǵan Ekonomıkalyq damý jáne saýda vıtse-mınıstri Qýandyq Bıshimbaev.
Zań jobasymen jumys barysynda depýtattar 900-den astam usynystar engizdi. Atap aıtqanda, memlekettik múlikti basqarý kezinde jer ýchaskelerin memleket muqtajy úshin májbúrlep ıelikten shyǵarý kezinde memlekettiń múlikke alý quqyqtaryn alý tártibin naqtylaý sharalary qarastyryldy.
Birinshi oqylymda maquldanǵan zań jobasy ekinshi oqylymǵa ázirleý úshin Bas komıtetke joldandy.
