Májilis memlekettik múlik qyzmetin retteýge baǵyttalǵan zań jobasyn komıtetke qaıtardy
ASTANA. 12 qańtar. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Memlekettik múlik týraly» zań jobasyna Parlament Senaty tarapynan engizilgen túzetýlerdi talqylady.
Nátıjesinde zań jobasyna qatysty senatorlardyń usynystaryn áli de pysyqtaı túsý úshin qujat Bas komıtetke qaıtaryldy.
Zań jobasynyń basty maqsaty - memlekettik múlikke memlekettik quqyqty júzege asyrý úderisinde qalyptasqan qatynastardy retteıtin memlekettik múlikti basqarýdyń quqyqtyq negizderin, qaǵıdattary men erejelerin aıqyndaıtyn zańnamalyq bazany jetildirý bolyp tabylady. Bul rette Memleket basshysy óz Joldaýynda osy zamanǵy ekonomıkalyq jaǵdaıda ózgerip otyrǵan memlekettiń rólin memlekettik aktıvterdi tıimdi basqarý problemalaryna jańa turǵydan qaraý qajettigin aıtqan bolatyn. Bulardy zańnama normasyna aınaldyrý qajettigin, sonyń ishinde memlekettik aktıvterdi basqarý týraly bólek zańnyń bolýy tıistigin alǵa tartqan edi.
Budan bólek, qujat jeke menshik pen memlekettik menshiktiń teń bolý qaǵıdaty saqtalǵan jaǵdaıda memlekettik basqarýshy tujyrymdamasyna negizdelgen. Jalpy zań jobasyn ázirleý negizgi úsh maqsatty qamtıdy. Birinshiden - memlekettik menshiktiń jáne ózge de quqyqtardyń ıesi retinde memlekettik múlikke quqyqtardy tıimdi júzege asyrýdy qamtamasyz etý. Ekinshiden - memlekettik múlikti basqarýdy júzege asyratyn memlekettik organdar quziretiniń arajigin ajyratý jáne memlekettik organdar men olardyń basshylaryn memlekettik múlikti basqarý salasyndaǵy memlekettik saıasatty júrgizýdegi jaýapkershiligin arttyrý. Úshinshiden - ulttyq holdıngter men ulttyq kompanııalar arqyly memlekettik múlikti korporatıvtik basqarýdyń quqyqtyq negizderin, olardyń memlekettik organdarmen naqty qarym- qatynasyn qamtamasyz etýge jaýapkershiligin belgileý.
Eskere ketetin jaıt, Senattyń jasaǵan túzetýlerine Úkimet oń qorytyndy bergen bolatyn. Túzetýlerdi talqylaý barysynda depýtat Ramazan Sárpekov senatorlardyń usynysymen áleýmettik kásipkerlik korporatsııalardy ulttyq kompanııa retinde qaıta qurýdy jergilikti bılikke berýge qatysty máseleni áli de pysyqtaı túsý qajettigin alǵa tartty. Depýtattardyń basym bóligi osy máseleni qoldap, zań jobasyn Bas komıtetke tapsyrdy.
