Májilis memlekettik monopolııa máseleleri boıynsha Senatpen kelisti
ASTANA. 20 maýsym. QazAqparat - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine memlekettik monopolııa máseleleri boıynsha ózgerister men tolyqtyrýlar engizý týraly» zań jobasyn talqylady.
Eske salsaq, buǵan deıin májiliste maquldaǵan zań jobasyna Senat birqatar túzetý engizgen bolatyn. Osyǵan oraı Májilis depýtattary Senat engizgen ózgeristerge kelisimin berdi.
Zań jobasy ekonomıkaǵa memlekettiń aralasýyn azaıtýdy qarastyrady. Bul rette ulttyq qaýipsizdikti, memlekettiń qorǵanys qabilettiligin, qoǵamdyq tártipti, halyq densaýlyǵyn qorǵaý maqsattarynda kásipkerlik qyzmetke memlekettiń qatysýy talap etiletin aıryqsha jaǵdaılarda ǵana memlekettik monopolııa engizý kózdeletin bolady.
Osy maqsatta zań jobasymen 29 zańnamalyq aktige, onyń ishinde Jer, Orman, Ekologııalyq kodekster men «Halyq densaýlyǵy jáne densaýlyq saqtaý júıesi týraly» kodeks, «Ósimdikter karantıni týraly», «Baılanys týraly», «Memlekettik statıstıka týraly» jáne basqa da zańdarǵa tıisti ózgerister engizilgen.
Toqtala ketetin jaıt, qoldanystaǵy 10 zańnamalyq aktide memlekettik monopolııa týraly normalar qamtylǵan. Alaıda, ony iske asyrý tetigi ashyp kórsetilmegen. 14 zańnamalyq aktide qyzmet memlekettik monopolııaǵa tikeleı jatqyzylmaǵan, degenmen, memlekettik kásiporynnyń osy qyzmetti júzege syrýǵa aıryqsha quqyǵy naqty bekitilgen. Osyǵan oraı, jańa zań jobasyna sáıkes, memlekettik monopolııada tek 18 qyzmet túri ǵana qalady. Budan bólek, eki qyzmet túri memlekettik fýnktsııaǵa jatqyzylady.
