Májilis memlekettik qyzmet pen sybaılas jemqorlyqqa qarsy kúres máselelerine arnalǵan zań jobasyn eki oqylymda maquldady
ASTANA. 17 qarasha. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine memlekettik qyzmet jáne sybaılas jemqorlyqqa qarsy kúres máseleleri boıynsha ózgerister men tolyqtyrýlar engizý týraly» zań jobasyn eki oqylym boıynsha qarap, qujatty maquldady.
Atalǵan qujat múddeler qaqtyǵysyn bolǵyzbaýǵa jáne retteý tártibin reglamentteýge baǵyttalady. Bul rette memlekettik qyzmetshiniń memlekettik qyzmetten bosatylǵan keıin belgili bir kezeń ishinde óziniń mindetterin atqarý barysynda tikeleı baqylaýynda nemese quzyretine sáıkes tikeleı baılanysty bolǵan kommertsııalyq uıymdarǵa aýysýyna tyıym salýdy belgileýge baǵyttalǵan.
Sondaı-aq memlekettik qyzmetshiler úshin belgilengen shekteýlerdi memlekettik uıymdarda jáne memlekettiń qatysý úlesi bar uıymdarda basqarý fýnktsııalaryn oryndaıtyn adamdarǵa da qoldaný tapsyrylǵan. Bundaı tıym salýlar boıynsha, ıaǵnı azamattarǵa memlekettik qyzmetten bosatylǵannan keıin kommertsııalyq uıymdarda jumysqa ornalasý tıym salynatyn normany Eńbek kodeksine engizý kózdeledi.
«Memlekettik qyzmetshiler úshin belgilengen shekteýler memlekettik uıymdarda jáne memlekettiń qatysý úlesi bar uıymdarda basqarý fýnktsııasyn oryndaıtyn adamdarǵa qoldanylady. Tıisti normalar «Sybaılas jemqorlyqqa qarsy kúres týraly» zańyna engiziledi», delingen Májilis komıtetiniń qorytyndysynda.
