Májilis memlekettik baspanaǵa quqyǵy bar adamdar tobyn anyqtaýǵa baǵyttalǵan qujatty maquldady
ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine turǵyn úı qatynastary máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady. Alaıda, óz usynystary Úkimet pen bas komıtet tarapynan qoldaý tappaǵandyqtan Májilistegi «Aq jol» partııasynyń fraktsııasy zań jobasyn qoldaýdan bas tartyp, qarsy daýys berdi.
Eske salaıyq, qujattyń maqsaty qoldanystaǵy zań aktilerindegi qaıshylyqtardy joıý, sybaılas jemqorlyq qylmysqa yqpal etetin normalardy alyp tastaý arqyly zańnamany jetildirý bolyp tabylady.
Budan bólek, qujat turǵyn úı qatynastary salasynda ákimshilik quqyq buzýshylyqtardyń jańa quramdaryn engizý, memlekettik baspana alýǵa úmitker adamdardyń tobyn anyqtaý úshin bıýdjettik uıym uǵymyn engizýdi qarastyrady. Ýákiletti organdardyń turǵyn úıge qoıylatyn tehnıkalyq talaptary boıynsha quzyretin anyqtaý qarastyrylyp, kondomınıým nysanyn basqarý organdary qyzmetiniń ashyqtyǵyn qamtamasyz etý kózdeledi.
Sonymen qatar, kondomınıým nysandaryn basqarý organdaryna qatysty turǵyn úı-kommýnaldyq sharýashylyq salasy boıynsha quqyq buzýshylyqtardyń jańa quramy, turǵyn úı qatynastary týraly zańnamaǵa «bıýdjettik uıymdardyń qyzmetkerleri» týraly jańa uǵym engiziledi. Sonymen qatan, zań jobasynda kóp balaly otbasylardyń memlekettik turǵyn úı qorynan baspana alǵanǵa deıin olardyń kezegin saqtaý, Uly Otan soǵysynyń qatysýshylary men múgedekterine jáne solarǵa teńestirilgen adamdarǵa beriletin jeńildikter men olardy áleýmettik qorǵaý, jetim balalardyń, ata-analarynyń qamqorlyǵynan aıyrylǵan balalardyń turǵyn úıge sózsiz quqyǵyn saqtaı otyryp, olardyń arasynda páterler bólý úshin eń kemi jıyrma paıyzdyq kvota bekitý týraly usynystar da qabyldanǵan.
Májilis maquldaǵan zań jobasy Parlament Senatyna joldanady.
