Májilis memlekettik basqarý júıesin jetildirý boıynsha kelisim komıssııasynyń usynystaryn qabyldady
ASTANA. QazAqparat - Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik basqarý júıesin odan ári jetildirý máseleleri boıynsha ózgerister men tolyqtyrýlar engizý týraly» zań jobasyna qos palata arasyndaǵy kelispeýshilikterdi eńserý jónindegi kelisim komıssııasynyń usynysy qaralyp, qabyldandy.
Eske sala keteıik, buǵan deıin senatorlar Májilis maquldaǵan «Qazaqstan Respýblıkasynyń keıbir zańnamalyq aktilerine memlekettik basqarý júıesin odan ári jetildirý máseleleri boıynsha ózgerister men tolyqtyrýlar engizý týraly» zań jobasyna tolyqtyrýlar jasaǵan bolatyn. Alaıda, Májilis tarapy Senat engizgen keıbir túzetýmen kelispeıtindikterin bildirip, kelisim komıssııasyn qurý týraly sheshim qabyldady.
Aıta keteıik, atalmysh zań jobasy Memleket basshysynyń 2014 jyldyń 6 tamyzyndaǵy «Qazaqstan Respýblıkasynyń memlekettik basqarý júıesin ári qaraı jetildirý sharalary týraly» Jarlyǵyn iske asyrý aıasynda ázirlengen. Jarlyqqa sáıkes, memlekettik qyzmet isteri jónindegi jáne ekonomıkalyq jáne sybaılas jemqorlyqqa qarsy kúres agenttigi taratylyp, Memlekettik qyzmet jáne jemqorlyqqa qarsy turý isi jónindegi agenttik qurylǵan edi. Osyǵan baılanysty, zań jobasy taratylǵan agenttiktiń jemqorlyq qylmystyń jáne zań buzýshylyqtyń aldyn alý, anyqtaý, jolyn kesý, ashý, tekserý jónindegi fýnktsııalary men ókilettikterin jańa qurylǵan agenttikke, al ekonomıkalyq jáne qarjy qylmysy men zań buzýshylyqty Qarjy mınıstrligine ótkizip berý qaralǵan. Agenttik pen qarjy mınıstrliginiń tıisti bólimshelerine quqyq qorǵaý organy mártebesi beriledi.
