Májilis memlekettik baqylaý jáne qadaǵalaý týraly jobany ekinshi oqylymda maquldady
ASTANA. 24 qarasha. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda «Qazaqstan Respýblıkasyndaǵy memlekettik baqylaý jáne qadaǵalaý týraly» zań jobasyn ekinshi oqylymda maquldandy.
Atalǵan zań jobasy Memleket basshysynyń 2008 jylǵy 6 qarashadaǵy sybaılas jemqorlyqqa qarsy kúreske arnalǵan forýmda bergen tapsyrmalaryn oryndaýǵa baǵyttalǵan bolatyn. Bul rette memlekettik ákimshilik organdarynyń baqylaý men qadaǵalaýy bir jaǵynan memlekettik basqarýdy, ekinshi jaǵynan zańdylyqty qamtamasyz etý tásilderin bildiredi. Sonymen qatar, qujat ınstıtýtsıonaldyq uıymdastyrý jáne osy qyzmettiń mazmuny jaǵynan, tekserýshiler men tekseriletinderdiń tikeleı baılanystary jaǵynan da ózekti bolyp tabylady.
Zań jobasymen memlekettik organdardyń baqylaý-qadaǵalaý qyzmetiniń jalpy máselelerin retteýge jáne onyń negizgi qaǵıdalaryn belgileýge biryńǵaı quqyqtyq negiz qalyptastyrý kózdeledi. Bul rette quqyqtyq retteýge qatysty jeke salalardyń ereksheligin eskere otyryp, memlekettik baqylaý jáne qadaǵalaý júrgizýdi salalyq zańnamalyq aktilerde qaldyrý usynylady. Qujat boıynsha memlekettik organdardyń tek sharýashylyq sýbektileri ǵana emes, organdardyń ózderine qatysty baqylaý jáne qadaǵalaý fýnktsııalaryn iske asyrý tártibin jetildirý qarastyrylǵan. Sonymen birge, alǵash ret zańdy túrde «baqylaý» jáne «qadaǵalaý» uǵymyn ajyratý sharalary kózdeledi. Budan bólek, zań jobasynda tekserýlerdi uıymdastyrý, júrgizý tártipteri qarastyrylady. Zań jobasymen baqylaý jáne qadaǵalaý túrleri belgilenedi. Baqylaýǵa jatatyn sýbektilerge tekserýdi júzege asyrý máseleleri retteledi.
