Májilis medıtsınalyq buıymdarǵa qatysty zań jobasyn maquldady

ASTANA. QazAqparat – Májiliste «2014 jylǵy 23 jeltoqsandaǵy Eýrazııalyq ekonomıkalyq odaq sheńberinde medıtsınalyq buıymdar aınalysynyń biryńǵaı qaǵıdattary men qaǵıdalary týraly kelisimge ózgeris engizý týraly hattamany ratıfıkatsııalaý týraly» zańy jobasy maquldandy, dep habarlaıdy QazAqparat.

QR Densaýlyq saqtaý mınıstri Ajar Ǵınııattyń aıtýynsha, Eýrazııalyq ekonomıkalyq odaqtyń ortaq naryǵynda medıtsınalyq buıymdardyń aınalysyn retteý tıisti kelisimge sáıkes júzege asyrylady.

«Búgingi tańda Eýrazııalyq ekonomıkalyq komıssııa keńesi osy odaq sheńberinde medıtsınalyq buıymdar aınalysynyń biryńǵaı qaǵıdalary týraly kelisimge ózgerister engizý týraly 4 hattamany maquldady. Ratıfıkatsııalaý maqsatynda sizderge qaraý úshin №1,2 hattama engizilip otyr. Qalǵan ekeýi elishilik kelisýmen qol qoıý kezeńinde. Qaralyp otyrǵan birinshi hattamany ratıfıkatsılaý jobasy Eýrazııalyq ekonomıkalyq odaq sheńberinde medıtsınalyq buıymdardy qaıta tirkeýdi qajet etpeıdi. Ulttyq rásim boıynsha berilgen merzimsiz tirkeý kýálikteri bar medıtsınalyq buıymdarǵa QR aýmaǵynda aınalymyn jalǵastyra berýge múmkindik beredi», - dedi mınıstr Májilistiń búgingi otyrysynda.

Zańnama boıynsha 10 myńnan astam medıtsınalyq buıym tirkelgen, olardy Eýrazııalyq ekonomıkalyq odaq sheńberinde qaıta tirkeýdiń qajeti joq.

«Qaralyp otyrǵan ekinshi hattamany ratıfıkatsııalaý jobasy ulttyq tirkeýdi 2022 jylǵy 31 jeltoqsanǵa deıin uzartýǵa, ulttyq zańnama boıynsha jańa medıtsınalyq buıymdardy tirkeýge múmkindik beredi. Jyl sońyna deıin medıtsınalyq buıymdardy ulttyq tirkeýdi uzartý sharasy Eýrazııalyq ekonomıkalyq odaqqa jáne múshe memleketterdiń medıtsınalyq uıymdarynyń, óndirýshilerdiń tolyq daıyn bolýy úshin jetkiliksiz bolǵanyn atap ótken jón. Soǵan baılanysty bıznes qaýymdastyqpen birge, onyń ishinde otandyq medıtsınalyq buıymdar óndirýshilermen birlesip, ratıfıkatsııaǵa deıin ulttyq tirkeýdi 2025 jyldyń 31 jeltoqsanyna deıin uzartýǵa múmkindik beretin tórtinshi hattama qaraldy», - dedi A. Ǵınııat.

Hattamalarda baıandalǵan usynystardy Eýrazııalyq ekonomıkalyq odaqqa múshe 5 memleket sarapshylarynyń deńgeıinde, jumys toptarynda talqylanyp, Eýrazııalyq ekonomıkalyq alqasymen keńesinde qaralyp, qoldaý tapty.

«QR naryǵynda medıtsınalyq buıymdar tapshylyǵynyń týyndaýyna jol bermeý úshin osy hattamalardy ratıfıkatsııalaýdy qoldaýdy suraımyz», dedi Densaýlyq saqtaý mınıstri.