Májilis maqta salasyn damytýǵa baǵyttalǵan zań jobasy boıynsha Senatqa kelisim bildirdi

ASTANA. QazAqparat - QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine maqta salasyn damytý máseleleri boıynsha ózgerister men tolyqtyrýlar engizý týraly» zań jobasyna Senat engizgen ózgerister qaraldy. Ol boıynsha Májilis depýtattary senatorlar túzetýine kelisim berdi. Osylaısha, Parlament atalǵan qujatty qabyldap otyr. Endi zań jobasy Memleket basshysynyń qol qoıýyna joldanady.

Májilis depýtattary bastamashylyq jasaǵan zań jobasy negizinen elimizdiń maqta salasyn damytýǵa baǵyttalady. Atap aıtqanda, munda birinshiden, memlekettik basqarý deńgeıleri arasyndaǵy ókilettikterdiń arajigin ajyratý jáne maqta óńdeý uıymdaryn ýaqytsha basqarýdy engizý, uzartý jáne toqtata turý máseleleri boıynsha ókilettikterdi sotqa berý kezinde týyndaǵan kollızııalary joıylady. Ekinshiden, zań buzýshylyqqa jaǵdaı jasaıtyn sharttardy joıý maqsatynda maqta óńdeý uıymyna ýaqytsha basqarýdy engizýdi ýákiletti organ uıymyna emes, sot sheshimimen engizý kózdeledi. Úshinshiden, maqta naryǵyna qatysýshylar qataryna «maqta daıyndaý uıymy» degen uǵym engizý qarastyrylǵan. Bul rette atalmysh uıym arqyly shıtti maqta satyp alýshylardyń maqta naryǵyna qatysýyna jaǵdaılar jasalady.

Tutastaı alǵanda, zań jobasynda maqta óńdeý uıymdarynyń káspkerlik qyzmetti júzege asyrýyna qoıylǵan barlyq shekteýlerdi alyp tastaý usynylyp otyr. Bul olarǵa maqtashylardyń qajettiligine, maqta óndirisi jumystarynyń maýsymdylyǵyna den qoıýda ıkemdilikti qamtamasyz etedi.

Senat Májilis maquldaǵan zań jobasyna bes pozıtsııadan turatyn ózgerister engizgen bolatyn. Tómengi palata depýtattary buǵan óz kelisimderin berip otyr.