Májilis magıstraldyq qubyrlarǵa qatysty zań jobasyn birinshi oqylymda maquldady
ASTANA. 24 mamyr. QazAqparat - Búgin Májilistiń jalpy otyrysynda palata depýtattary «Magıstraldyq qubyr týraly» jáne «Qazaqstan Respýblıkasynyń keıbir zańnamalyq aktilerine magıstraldyq qubyr máseleleri boıynsha ózgerister men tolyqtyrýlar engizý týraly» zań jobalaryn birinshi oqylymda maquldady.
Atalǵan zań jobasy elimizdiń ekonomıkasy úshin strategııalyq mańyzy bar magıstraldyq qubyr salasyndaǵy qatynastardy retteý jolymen Qazaqstan Respýblıkasynyń ekonomıkalyq jáne energetıkalyq qaýipsizdigin nyǵaıtý maqsatynda ázirlengen. Bul rette magıstraldyq qubyr salasyndaǵy quqyqtyq qatynastardyń mańyzdy bóligi ulttyq zańnamamen rettelmegen. Osynyń ózi magıstraldyq qubyrlardy damytý úshin tejeýshi faktor bolyp tabylady.
Osyǵan oraı ázirlengen zań jobasynyń basty jańalyǵy magıstraldyq qubyrlardy qaıta qurý arqyly olarǵa memlekettiń basym quqyqtaryn bekitý kózdeledi. Sonymen qatar, magıstraldyq qubyr salasyndaǵy qyzmet kórsetetin nemese onyń qyzmetin paıdalanatyn tulǵalardyń mindeti men quqyqtaryn anyqtaý qarastyrylady. Budan bólek osy salada ulttyq operator ınstıtýtyn engizý máselesi de kózdeledi.
Toqtala ketetin jaıt, elimizde óndiriletin kómirsýtekti shıkizattardyń aıtarlyqtaı úlesi magıstraldyq qubyrlar arqyly ishki jáne syrtqy naryqqa shyǵady. Sondyqtan da, bul másele strategııalyq mańyzǵa ıe bolyp otyr. Sondaı-aq, magıstraldyq qubyrlar arqyly munaı tasymaldaý el bıýdjetiniń túsimin aıtarlyqtaı arttyratyny belgili. Áıtse de, osyndaı mańyzdylyǵyna qaramastan, magıstraldyq qubyrlar máselelerine baılanysty zańdyq qatynastardy retteıtin naqty zańnamalyq aktiler áli joq.
Zań jobasy qabyldansa, elimizde qaıta salynatyn jáne qoldanystaǵy kez kelgen (meıli memlekettik, meıli jekemenshik bolsa da) magıstraldyq qubyrlarǵa memlekettiń qatysýyn qamtıtyn basym quqyǵy bekitiletin bolady. Al jańa qubyrlar salý barysynda birinshi kezekte qubyrlardy salýda memlekettiń ekonomıkalyq múddesi qorǵalatyn bolady.
