Májilis «Magıstraldyq qubyr týraly» zań jobasyn ekinshi oqylymda talqyǵa salady
ASTANA. 30 mamyr. QazAqparat - 31 mamyr, beısenbi kúni Májilistiń jalpy otyrysy ótedi.
Májilistiń baspasóz qyzmetinen kelip túsken málimetke sáıkes, Ekologııa máseleleri jáne tabıǵat paıdalaný komıtetiniń usynýy boıynsha «Magıstraldyq qubyr týraly» jáne soǵan sáıkes ilespe zań jobalaryn ekinshi oqylymda talqyǵa salý úshin jalpy otyrystyń kún tártibine engizilgen.
Jalpy otyrysta agroónerkásiptik keshendi damytý jáne qoldaý máselelerin retteýge baǵyttalǵan jáne densaýlyq saqtaýǵa qatysty zań jobalary ekinshi oqylymda Palatanyń talqysyna shyǵarylatyny kózdelýde. Bul zań jobalardy Palatanyń tıisinshe Agrarlyq máseleler, sondaı-aq Áleýmettik-mádenı damý komıtetteri usynyp otyr.
Sonymen qatar Áleýmettik-mádenı damý komıteti «Qazaqstan Respýblıkasynyń memlekettik rámizderi týraly» Konstıtýtsııalyq zańynyń jobasy jáne soǵan sáıkes ilespe zań jobasyn ekinshi oqylymda talqyǵa usynyp otyr.
Qarjy jáne bıýdjet komıtetiniń usynýymen «Qazaqstan Respýblıkasynyń keıbir zańnamalyq aktilerine zańsyz jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa jáne aqshany qolma-qol aqshaǵa aınaldyrýǵa qarsy is-qımyl máseleleri boıynsha ózgerister men tolyqtyrýlar engizý týraly» Parlament Senaty engizgen ózgerister men tolyqtyrýlar da qaralady.
Jalpy otyrysta Úkimetten kelip túsken zań jobasy boıynsha qorytyndy ázirleý jóninde másele qaralady.
