Májilis mádenı saıasat tujyrymdamasyn iske asyrýǵa baǵyttalǵan zań jobasyn maquldady
ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine mádenıet jáne tarıhı-mádenı mura máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady.
Zań jobasy Memleket basshysy N. Nazarbaevtyń «Nur Otan» partııasynyń XVI sezinde júktegen tapsyrmalaryn, sondaı-aq QR mádenı saıasatynyń tujyrymdamasyn iske asyrýǵa baǵyttalady. Bul rette Qazaqstan ratıfıkatsııalaǵan materıaldyq emes mádenı murany qorǵaý týraly konventsııa negizinde materıaldyq emes mádenı murany qorǵaýǵa jáne BUU qyzmetine Qazaqstannyń qatysýyna baǵyttalǵan normalar qamtylady.
Qujatqa sáıkes, mádenı qoǵamdastyqty tartý jáne mádenıet salasyndaǵy basqarýshylyq máselelerdi úılestirý maqsatynda QR Prezıdenti janynan Ádebıet jáne óner jónindegi ulttyq keńes qurý kózdelgen. Budan bólek, mádenıet salasyndaǵy memlekettik saıasatty jetildirý úshin ýákiletti organ janynan salalyq kórkemdik keńester qurý qarastyrylady.
Májilis maquldaǵan zań jobasy Senatqa joldanady.
