Májilis Qylmystyq kodeks jobasyn ekinshi oqylymda maquldady

Qylmystyq kodeks jobasy zaman talabyna saı, tájirıbede synnan ótken qylmystyq-quqyqtyq ınstıtýttardy saqtaı, ári tulǵany, qoǵamdy jáne memleketti tıimdi qorǵaý úshin tıisinshe jańalaı otyryp ázirlengen bolatyn. Kodeks jobasy Elbasy N.Nazarbaevtyń Qazaqstan halqyna Joldaýynda júktelgen mindetterdi, sondaı-aq Qazaqstan Respýblıkasynyń 2010 jyldan 2020 jylǵa deıingi kezeńge arnalǵan quqyqtyq saıasat tujyrymdamasy erejelerin iske asyrady.

Budan bólek, kodeks birinshi ret jasalǵan nemese áleýmettik turǵydan osal adamdar jasaǵan qylmysqa qatysty toleranttyq ustanymdy keńeıtedi. Bunymen qosa, aýyr qylmystarǵa, qylmystyń qaıtalaný kórinisterine, uıymdasqan qylmysqa jáne sot tóreligine qarsylyq bildirýge qatysty sharalardy qatańdatady. Jalpy kodeks jobasynda, qylmystyq quqyq buzýshylyqty birinshi ret jasaǵan kámeletke tolmaǵandarǵa, áleýmettik turǵydan osal adamdardyń basqa da sanattaryna qylmystyq saıasatty yryqtandyrýmen jáne izgilendirýmen qatar, qylmystyń barlyq jańa túrlerine qarsy kúrestiń negizderi qalanǵan, krımınaldyq qyzmettiń belsendiligi baıqalatyn salalarda jazalaý qatańdatyldy, ulttyq kelisim tuǵyryna nuqsan keltirýdiń jáne áleýmettik janjaldardy arandatýdyń kez kelgen áreketi úshin qatań jazalaý kózdeledi. Zań jobasy boıynsha baıandaǵan depýtat Nurlan Ábdirovtiń aıtýynsha, ekinshi oqylymǵa ázirleý barysynda úsh júzge tarta túzetýler engizilgen. «Osy usynystardy talqylaý kezeńinde Májilis depýtattary úshin eń ózekti máselelerdiń biri - túrmedegiler sanyn qysqartýǵa zańdyq joldardy qarastyrý boldy. Osy turǵyda depýtattar, Úkimet músheleri, halyqaralyq uıymdar, ǵalymdar men sarapshylar uqsas kózqaras ustandy», - dedi jumys tobynyń jetekshisi depýtat Nurlan Ábdirov.

Onyń aıtýynsha, kodeks jobasy birqatar mańyzdy normalarmen tolyǵyp otyr.

Májilis maquldaǵan kodeks jobasy Senatqa joldanady.