Májilis qurylys salasyn qadaǵalaýdy qatańdatatyn zań jobasyn maquldady
ASTANA. QazAqparat - Búgin Májilistiń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine qurylystaǵy baǵa belgileý, sáýlet-qurylys baqylaýyn, sondaı-aq obektilerdi paıdalanýǵa qabyldaýdy júzege asyrý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy.
Májilistiń bir top depýtaty bastamashylyq jasaǵan qujattyń negizgi maqsaty sáýlet-qurylys qyzmeti salasyndaǵy baqylaý men qadaǵalaýdyń qoldanystaǵy júıesin, qurylystaǵy baǵa belgileýdi, memlekettik normatıvter men ruqsat berý júıesin jetildirý bolyp tabylady. Bul rette usynylǵan normalar qurylys jáne jobalaý sapasyn jaqsartýǵa, qurylys salasyndaǵy menedjment deńgeıin arttyrýǵa, jańa tehnologııalar men tıisti smetalyq normalardy engizýdi jyldamdatýǵa baǵyttalady. Qala qurylysy men sáýlet jáne qurylys qyzmeti salasyndaǵy zań talaptary qataıa túsedi.
Sonymen qatar, zań jobasy arqyly aýdandyq ákimdikterdi qospaǵanda barlyq deńgeıdegi ákimdikterge nysandar men keshenderdiń qurylysyna arnalǵan joba aldyndaǵy, jobalaý qujattamasyn qarastyrý men bekitý jónindegi fýnktsııalar berý kózdeledi. Budan bólek, «100 naqty qadam» Ult josparyn júzege asyrý aıasynda zań jobasy birqatar ózgeristerdi qamtyp otyr. Atap aıtqanda, qurylys barysynda ruqsat berý úderisin ońaılatý, qurylys qunynyń smetasyn aıqyndaýdyń resýrstyq ádisin engizý, eskirgen qurylys normalary men erejeleriniń ornyna jańa eýrokodtar engizý qarastyrylady.
Zań jobasy aıasynda qurylys salasyndaǵy ákimshilik jaýapkershilikti keńeıtý máseleleri de qamtyldy. Bul rette ǵımarattar men qurylystardyń beriktigin zertteýdi júzege asyratyn tulǵalardyń zań talaptaryn buzýyna qatysty jaýapkershiligi qataıady. Al astananyń biryńǵaı sáýlettik kelbetin qalyptastyrý maqsatynda sapasy tómen fasadtardy jergilikti bıýdjet esebinen aýystyrý da kózdeledi.
Qujat boıynsha ınjenerlik-tehnıkalyq qyzmetkerlerdi attestattaý ınstıtýtyn engizý, qurylys jobalaýdy basqarý jónindegi kompanııalardy, sondaı aq ǵımarattar men qurylystardyń beriktigine jáne ornyqtylyǵyn qadaǵalaý men tehınkalyq zertteýdi júzege asyratyn zańdy tulǵalardy akkredıtatsııalaý qarastyrylady.
Májilis maquldaǵan qujat Senatqa joldanady.
