Májilis quqyq normalary arasyndaǵy qaıshylyqtardy joıyp, sybaılas jemqorlyq jasaýǵa yqpal etetin normalardy joıýǵa baǵyttalǵan qujatty maquldady
ASTANA. 7 naýryz. QazAqparat - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine ártúrli zańnamalyq aktilerdiń quqyq normalary arasyndaǵy qaıshylyqtardy,
olqylyqtardy, kollızııalardy jáne sybaılas jemqorlyq quqyq buzýshylyqtar jasaýǵa yqpal etetin normalardy joıý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Zań jobasy QR Prezıdentiniń Jarlyǵymen bekitilgen Qazaqstannyń Quqyqtyq saıast tujyrymdamasyn iske asyrý maqsatynda ázirlengen.
Bul rette qujat qoldanystaǵy zańnamanyń normalaryn rettestirý, quqyqtyq normalardaǵy qaıshylyqtardy joıý, sybaılas jemqorlyq sıpatyndaǵy eskirgen qaǵıdalar men normalardy alyp tastaý maqsatyn kózdeıdi. Osyǵan baılanysty zań jobasy birqatar baǵyttardy qamtyp otyr. Atap aıtqanda, ártúrli zańnamalyq aktilerdiń quqyqtyq normalary arasyndaǵy qaıshylyqtar, olqylyqtar, kollızııalar alyp tastalady. Sybaılas jemqorlyq quqyq buzýshylshyq jasaýǵa yqpal etetin normalar da alynady.
Qujat boıynsha qoldanystaǵy 47 zańnamalyq aktilerge, onyń ishinde 6 kodekske túzetýler engizý usynylǵan.
Ádilet mınıstri Berik Imashevtyń aıtýynsha, zań jobasyn qabyldaý keleńsiz quqyqtyq jáne áleýmettik-ekonomıkalyq saldarǵa ákep soqtyrmaıdy. Óıtkeni ózgerister negizinen qoldanystaǵy qujattardy jetildirýge baǵyttalady. Bul tıisti qoǵamdyq qatynastardy quqyqtyq retteýdiń tıimdiligine yqpal etedi.
Zań jobasy ekinshi oqylymǵa ázirlenetin bolady.
