Májilis quqyq normalary arasyndaǵy qaıshylyqtardy joıýǵa baǵyttalǵan zań jobasyn maquldady
ASTANA. 3 sáýir. QazAqparat - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine ártúrli zańnamalyq aktilerdiń quqyq normalary arasyndaǵy qaıshylyqtardy,
olqylyqtardy, kollızııalardy jáne sybaılas jemqorlyq quqyq buzýshylyqtar jasaýǵa yqpal etetin normalardy joıý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Qujat elimizdiń quqyqtyq saıasat tujyrymdamasyn iske asyrý maqsatynda ázirlengen. Bul rette qoldanystaǵy zańnamany eskirgen jáne bir-birin qaıtalaıtyn normalardan aryltý, quqyqtyq retteýdegi olqylyqtardyń ornyn toltyrý, qoldanylyp júrgen quqyqtyń ishki qaıshylyqtaryn joıý qajettigi atap kórsetilgen bolatyn. Zań jobasymen 33 zańnamalyq aktige túzetý engizý kózdelgen. Atap aıtqanda, Іshki ister mınıstrligi memlekettiń áleýmettik sıpattaǵy tótenshe jaǵdaılarda áreket jasaýynyń quqyqtyq tetigin belgileýge baǵyttalǵan 13 zań aktisine túzetý engizý usynylady.
«Sosyn sybaılas jemqorlyq quqyq buzýshylyqtardyń jasalýyna yqpal etetin normalardy alyp tastaý kózdeledi», deıdi Ádilet mınıstri Berik Imashev.
