Májilis quqyq qorǵaý qyzmetin jańǵyrtýǵa baǵyttalǵan zańnamalyq túzetýlerdi maquldady
Zań jobasy Parlament Májilisine Memleket basshysynyń bastamasymen engizildi. Qujat jobasynda Qylmystyq-protsestik kodekske, «Jedel-izdestirý qyzmeti týraly» jáne «Prokýratýra týraly» Zańdarǵa ózgerister engizý kózdelgen.
Atalǵan zań jobasy aıasynda baıandama jasaǵan Bas prokýror Jaqyp Asanov táýelsizdik jyldarynda memleket tarapynan jasalǵan elimizdegi qylmystyq ahýaldy jaqsartý boıynsha sharalarǵa qysqasha toqtaldy. «Jalpy alǵanda zańdardy jetildirý bul turaqty, toqtamaıtyn protsess. Ony tereń oılastyryp, tarazylap, kezeń-kezeńimen jasaǵan durys. Bul rette adam quqyǵy men qylmyspen kúres arasyndaǵy teńgerim buzylmaýy tıis», - dep atap ótti Bas prokýror.
J. Asanovtyń pikirinshe, zań jobasyn eki blokqa bólýge bolady. Onyń birinshisi adam quqyǵyn qorǵaýdy kúsheıtse, al ekinshisi protsesti únemdeýge baǵyttalǵan. Adam quqyǵyn kúsheıtýdegi jańalyqtar - sottyń sanktsııasynsyz azamattardy ustaý merzimin 72-den 48 saǵatqa, al kámeletke tolmaǵandardy 24 saǵatqa deıin qysqartý; ekonomıkalyq qylmystar boıynsha kúzetpen ustaý túrindegi bultartpaý sharasynyń negizderin azaıtý; azamattarǵa ózderine qatysty júrgizilgen jasyryn tergeý áreketteri týraly habarlaý mindettiligi; advokattardyń ótinishhat usyný men dáleldemelerdi jınaý boıynsha quzyrettiligin keńeıtý.
«Ekonomıkalyq qylmys tergelip jatsa, tergeý kezinde eshkimdi qamamaýdy usynamyz. Bul endi bıznes jasap júrgen adamdar ǵoı. Olardyń qoǵamǵa degen, jeke adamǵa degen qaýpi joq. Olar qaıta bos júrse, óziniń bıznesin jalǵastyryp, adamdarǵa jumys oryndaryn saqtap qalady. Biraq bul jerde de bir erekshe jaǵdaı bar, ıaǵnı ol jalǵan aqsha jasaý, reıderlik jasaý nemese uıymdasqan qylmystyq toptarǵa qatyssa, bul turǵyda ekonomıkalyq qylmystardy bıznes dep aıtý qıyn. Sondyqtan olardy qamaýǵa alý qajet dep esepteımiz», - dep atap ótti Bas prokýror
Sonymen qatar J. Asanov taǵy bir ózgeristi atap ótti. Osy oraıda is qandaı faktimen tirkelse, tergeýshiler tergeýdi tek sonyń aıasynda ǵana júrgizýge mindetteledi. Olaı bolmaǵan jaǵdaıda prokýror nemese sot mundaı isterdi qysqartady.
Qylmystyq protsesti únemdeýge baǵyttalǵan ózgerister qataryna buıryq óndirisi ınstıtýtyn engizý men isterdi elektrondyq formatqa aýystyrýdy ataýǵa bolady.
«Eń bastysy - tsıfrlandyrý adam quqyǵyn qorǵaýdy kúsheıtedi. Búkil protsess alaqandaǵydaı aıqyn bolady. Prokýrorlyq baqylaý artady. Sybaılas jemqorlyq azaıady. ІT júıe tergeýshiniń, prokýror men sýdıanyń jumysyn anaǵurlym jeńildetedi», - dedi Bas prokýror.
Qylmystyq isterdi tolyqtaı tsıfrlyq formatqa kóshirýdi 2018 jyldyń sońyna deıin aıaqtaý josparlanyp otyr.
«Ár memleket óziniń ishki jaǵdaıyna qarap, tarazylap, kezeń-kezeńmen zańnamaǵa ózgerister engizip turady. Búgingi zań jobasy sondaı kezekti qadam bolyp otyr. Onyń basty ereksheligi bar, ıaǵnı Elbasy bizdiń aldymyzǵa úsh maqsatty qoıdy. Birinshiden, qylmystyq-protsestik kodekske qarapaıym adamnyń kózimen qarańdar dedi. Ekinshiden, bizde qylmystyq protsess memleket úshin óte qymbat, ıaǵnı tergeýshiler, prokýrorlar, sottar, myńdaǵan saraptamalar qamtylǵan, sondaı-aq atqarý merzimi tym uzaq ári kúrdeli. Prezıdent osyǵan únemdeý turǵysynan qaraýdy jáne adamnyń quqyǵy buzylmaıtyndaı tıisti qadamdardy eskerýdi júktedi. Úshinshiden, bul zań jobasymen quqyq qorǵaý organdaryn kúsheıtpeımiz. Olarǵa eshbir jańa bılik pen quzyret bermeımiz, kerisinshe moınymyzǵa mindet alamyz ári jaýapkershiligimizdi arttyramyz», - dep túsindirdi Bas prokýror
Esterińizge sala keteıik, bıyl qazan aıynda Memleket basshysy Konstıtýtsııanyń 61-babynyń 1-tarmaǵyna sáıkes Parlament Májilisiniń qaraýyna «Qazaqstan Respýblıkasynyń keıbir zańnamalyq aktilerine quqyq qorǵaý qyzmetiniń protsestik negizderin jańǵyrtý máseleleri boıynsha ózgerister men tolyqtyrýlar engizý týraly» zań jobasyn engizdi.
