Májilis quqyq qorǵaý qyzmeti týraly zań jobasy boıynsha Senat engizgen ózgeristerge kelisimin berdi
ASTANA. 15 jeltoqsan. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Quqyq qorǵaý qyzmeti týraly» zań jobasyna Parlament Senaty engizgen ózgeristerdi talqylady. Májilis Senat tarapynyń usynystaryn qabyldap, túzetýlerge kelisimin berdi.
Esterińizge sala keteıik, Májilis maquldaǵan zań jobasy quqyq qorǵaý fýnktsııalaryn júzege asyratyn memlekettik organdarda qyzmet atqarýǵa biryńǵaı kózqarasty belgileýge baǵyttalyp otyr. Bul rette qujat boıynsha prokýratýra, ishki ister, qarjy polıtsııasy jáne keden organdary, qylmystyq-atqarý júıesi men memlekettik órtke qarsy qyzmettiń mindetteri men áleýmettik kepildikteri qamtylady. Atap aıtqanda, quqyq qorǵaý organdary qyzmetkerleriniń quqyqtyq mártebesin jáne olardyń qyzmetti atqarýyn birizdendirýdi qamtamasyz etý, úmitkerlerdiń mindetti túrde taǵylymdamadan ótýi arqyly quqyq qorǵaý organdaryna qyzmetke qabyldaýdyń konkýrstyq tártibin belgileý usynylady. Budan bólek, quqyq qorǵaý organdarynyń laýazymdaryna biryńǵaı biliktilik talaptaryn belgileý úshin negizder jasaý sharalary kózdeledi.
Senatorlar zań jobasy boıynsha memlekettik jáne resmı tilderdegi mátinderdi sáıkestendirýdi kózdeıtin túzetýler jasaǵan bolatyn. Budan bólek, atys qarýyn, arnaýly quraldar men dene kúshin qoldanýdyń sharttaryn kózdeıtin jańa bap usynylǵan. Májilis bundaı túzetýlerge tolyq kelisimin berdi.
