Májilis kóshi-qonǵa qatysty birqatar zańdarǵa ózgerister engizilgen jobany maquldady
ANA. 20 sáýir. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Halyqtyń kóshi-qony týraly» zań jobasyna ilespe qujat retinde «QR keıbir zańnamalyq aktilerine halyqtyń kóshi-qon máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
«Jańa redaktsııadaǵy zań normalary keıbir zańnamalyq aktilerge de ózgeristerdi talap etedi. Bundaı zań aktileriniń ishinde QR Ákimshilik quqyq buzýshylyq týraly kodeksine Qazaqstan Respýblıkasynda tirkeýsiz nemese jeke basyn kýálandyratyn qujattarsyz turǵany úshin jaýaptylyq belgileý normasy engiziledi. Budan bólek, kodekske azamattardyń turǵylyqty jeri boıynsha tirkeý merzimderin buzǵany úshin jaýaptylyq belgileý de qarastyrylyp otyr», - dedi Eńbek jáne halyqty áleýmettik qorǵaý mınıstri Gúlshara Ábdiqalyqova.
Onyń aıtýynsha, «Qazaqstan Respýblıkasynyń azamattyǵy týraly» zańǵa azamattyǵy ártúrli sheteldikterdiń Qazaqstan Respýblıkasynda týǵan balalaryn naqtylaý, sondaı-aq kóship kelýshilerdiń jekelegen sanattaryn, onyń ishinde oralmandardyń QR azamattyǵyn jeńildetilgen tártippen alý boıynsha tolyqtyrýlar engiziledi.
