Májilis «Qorǵas» ortalyǵynyń qaýipsizdigine arnalǵan zań jobasyn maquldady

ASTANA. QazAqparat - «Qorǵas» ózenindegi «Shúkirbulaq» bógetiniń qurylysyn Qazaqstan men Qytaı birlesip qarjylandyrady. Bul týraly Parlament Májilisiniń jalpy otyrysynda bóget qurylysyna arnalǵan zań jobasyn tanystyrý kezinde QR Іshki ister mınıstri Qalmuhanbet Qasymov málim etti, dep habarlaıdy QazAqparat tilshisi.

«Ótken jyldyń maýsym aıynda bizdiń Úkimet pen Qytaı Úkimeti arasynda «Qorǵas» ózeninde «Shúkirbulaq» bógetin birlesip salýǵa arnalǵan kelisimge qol qoıyldy. Atalǵan bóget «Qorǵas» halyqaralyq ortalyǵynyń qaýipsizdigin qamtamasyz etý úshin qajet. Sebebi ortalyq óte joǵary sel men tasqyn qaýpi bar aýmaqta ornalasqan», - dedi Q. Qasymov.

Onyń sózine qaraǵanda, qurylysqa eki jaq teń qarjy bóletin bolady. Qurylystyń jalpy smetalyq quny 11,7 mlrd teńge.

«Buǵan kerekti qarajat 2018-2020 jyldarǵa arnalǵan respýblıkalyq bıýdjette qaralǵan», - dep naqtylady mınıstr.

Talqylaýdan keıin palata depýtattary «QR Úkimeti men QHR Úkimeti arasyndaǵy Qorǵas ózeninde «Shúkirbulaq (Almaly)» birlesken sel ustaıtyn bógetin salýdaǵy yntymaqtastyq týraly kelisimdi ratıfıkatsııalaý týraly» zań jobasyn maquldady.