Májilis Koreıa Respýblıkasynyń dıplomatııalyq ókildigi ǵımarattaryn salý úshin Astanadan jer berý týraly kelisimdi maquldady
ASTANA. 13 sáýir. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń Úkimeti men Koreıa Respýblıkasynyń Úkimeti arasyndaǵy Koreıa Respýblıkasynyń dıplomatııalyq ókildikteriniń ǵımarattaryn salý úshin Astana qalasynda jer ýchaskelerin berý týraly kelisimdi ratıfıkatsııalaý týraly» zań jobasyn maquldady.
Atalǵan qujatqa 2010 jylǵy 22 sáýirde Selýde qol qoıylǵan bolatyn. Bul rette kelisim Koreıa Respýblıkasynyń dıplomatııalyq ókildikterin salý úshin Astana qalasynda jer ýchaskelerin berý máselelerin zertteıdi. Qujattyń 1-babyna sáıkes Koreıa tarabyna Qazaqstan taraby Koreıa Respýblıkasynyń elshiliginiń ǵımaratyn salý úshin Astana qalasyndaǵy Obaǵan jáne Arǵanaty kósheleriniń qıylysyndaǵy jalpy alańy 1 gektar jerdi ýaqytsha óteýsiz paıdalanýǵa beredi.
Sondaı-aq, atalǵan respýblıka elshisiniń rezıdentsııasyn salý úshin Obaǵan kóshesindegi jalpy alańy 0,5 gektar jer ýchaskesin 49 jylǵa ýaqytsha óteýsiz paıdalanýǵa beretin bolady.
Májilis maquldaǵan zań jobasy Parlament Senatyna jiberiledi.
