Májilis kópbalaly otbasylarǵa járdemaqyny kóterýge negizdelgen zań jobasyn maquldady

NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine ana men balany qorǵaý máseleleri boıynsha ózgerister men tolyqtyrýlar engizý týraly» zań jobasy maquldandy, dep habarlaıdy QazAqparat tilshisi.

«Zań jobasyna Parlament depýtattary bastamashylyq etti. Atalǵan qujat balalardyń quqyqtary men zańdy múddelerin qorǵaýdy qamtamasyz etý jáne kópbalaly otbasylarǵa qoldaý kórsetý maqsatynda ázirlendi. Ózderińizge málim, 2020 jylǵy 1 qańtardan bastap kámiletke tolmaǵan 4 jáne odan kóp balalary bar otbasylar úshin jańa járdemaqy engizildi. Ol otbasynyń kirisine qaramastan 42 496 teńgeden bastap 74 388 teńgege deıingi somada taǵaıyndalady. Kópbalaly otbasyndaǵy balalardyń járdemaqy alý quqyqtaryna nuqsan keltirýdi bolǵyzbaý maqsatynda zań jobasynda 8 jáne odan kóp balalarǵa arnalǵan járdemaqynyń mólsherin tórt aılyq eseptik kórsetkishten, árbir keıingi balaǵa 10 myń teńgeden astam belgileý usynylyp otyr», - dedi zań jobasy boıynsha baıandama jasaǵan Májilis depýtaty Aıgúl Nurkına.

Osylaısha, segiz balasy bar otbasylarǵa beriletin járdemaqy mólsheri 84 832 teńgeni, toǵyz balaǵa – 95 436 teńgeni, on balaǵa – 106 myń teńgeni, sondaı-aq odan keıingi ár balaǵa tórt aılyq eseptik kórsetkishti quraıdy.

Búginde Eńbek jáne halyqty áleýmettik qorǵaý mınıstrliginiń aqparatyna qaraǵanda, elimizde 8-15 balasy bar 2 451 otbasy tirkelgen.

Budan buryn habarlanǵandaı, bıyl qańtar aıynyń sońynda Eńbek jáne halyqty áleýmettik qorǵaý mınıstri Birjan Nurymbetov bala sany jetiden asatyn otbasylarǵa járdemaqy somasy artatynyn aıtqan edi.