Májilis Konstıtýtsııanyń 78-babyn iske asyrýǵa arnalǵan jobany birinshi oqylymda maquldady
ASTANA. 18 sáýir. QazAqparat - Búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine Qazaqstan Respýblıkasy Konstıtýtsııasynyń 78-babyn iske asyrý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Atalǵan jobaǵa Májilis depýtattary bastamashylyq jasaǵan. Sondaı-aq, qujat QR Konstıtýtsııasynyń 78-babyn qoldanýǵa baılanysty qoldanystaǵy keıbir zańnamalyq aktilerdegi olqylyqtardy joıý maqsatynda ázirlengen. Atap aıtqanda, Ata zańnyń 13-babynda belgilengen árkimniń sotta qorǵalý quqyǵy adamnyń jáne azamattyń konstıtýtsııalyq quqyqtaryn, bostandyqtary men zańdy múddelerin qamtamasyz etýdiń kepildigi bolyp tabylady. Al, mundaı konstıtýtsııalyq quqyq, sondaı-aq sottardyń QR Konstıtýtsııalyq Keńesine júginý múmkindigi jolymen iske asyrylýy múmkin.
Qazaqstan Respýblıkasynyń Konstıtýtsııasynyń 78-baby naqty qylmystyq jáne azamattyq isterdi, sondaı-aq ákimshilik quqyq buzýshylyq týraly isterdi qaraý kezinde Konstıtýtsııalyq Keńeske júginýiniń quqyqtyq sharttaryn jasaıdy. Sonymen birge depýtattar konstıtýtsııanyń atalǵan babynyń erejelerin iske asyrý is júrgizý zańnamasynda oryn alǵan olqylyqtarmen qıyndatylǵanyn, onda Qazaqstan Respýblıkasy Konstıtýtsııalyq Keńesiniń normatıvtik-quqyqtyq aktini nemese onyń bólikterin konstıtýtsııalyq emes dep tabýdyń quqyqtyq saldary rettelmegenin alǵa tartady.
«Zań jobasyn qabyldaý sottyń Konstıtýtsııalyq Keńeske júginýine baılanysty sot isin júrgizýde týyndaıtyn birqatar quqyqtyq qatynastardy retteýge múmkindik beredi. Adamnyń jáne azamattyń konstıtýtsııalyq quqyqtaryn qorǵaý kepildigin arttyrady»,-dedi depýtat Nurlan Ábdirov.
