Májilis Konstıtýtsııanyń 78-babyn iske asyrý boıynsha zań jobasyna engizilgen ózgeristerdi talqylaıtyn bolady
ASTANA. 1 aqpan. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda depýtattar «Qazaqstan Respýblıkasynyń keıbir zańnamalyq aktilerine Qazaqstan Respýblıkasy Konstıtýtsııasynyń 78-babyn iske asyrý máseleleri boıynsha ózgerister men tolyqtyrýlar engizý týraly» zań jobasyn óndiriske aldy.
Zańnama jáne sot-quqyqtyq reforma komıtetiniń tóraǵasy Rahmet Muqashevtyń aıtýynsha, atalǵan zań jobasyna bir top depýtattar bastamashylyq jasaǵan. «Zań jobasy sot tóreligi barysyndaǵy azamattardyń konstıtýtsııalyq quqyqtarynyń qorǵalý deńgeıin arttyrýǵa baǵyttalady. Osy máselelermen baılanysty zańnamany tutastaı jetildirý máseleleri kózdeledi. Atap aıtqanda Ata zańnyń 78-babyn júzege asyrý barysynda qoldanystaǵy protsessýaldyq zańnamada qylmystyq isti toqtatý, qylmystyq is boıynsha óndiristi toqtatý baǵytynda kúshine engen sot aktilerin qaıta qaraý barysynda problemalar týyndaıdy. Buǵan uqsas problemalar ákimshilik quqyq buzýshylyq týraly zańnamalarda da kórinis taýyp otyr. Zań jobasy qoldanystaǵy zańnamalardan osy baǵyttaǵy olqylyqtardy joıýǵa arnalady», - deıdi depýtat R. Muqashev.
