Májilis komıtetiniń kóshpeli otyrysy Qorǵanys mınıstrliginde ótti
Basqosý barysynda Qorǵanys mınıstriniń birinshi orynbasary - Qazaqstan Qarýly Kúshteri Bas shtabynyń bastyǵy Sáken Jasuzaqov depýtattarǵa áskerı bilim men áskerı ǵylymdy damytýdyń jaǵdaıy men perspektıvalary týraly áńgimelep berdi. Onyń aıtýynsha, qazirgi tańda Qazaqstan Qarýly Kúshterinde áskerı kadrlardy daıyndaýdyń turaqty júıesi qalyptasqan. Sonymen qatar, áskerı bilim júıesi áskerı ǵylymnyń damý tájirıbesine negizdelip, áskerı ónerdiń teorııasy men tájirıbesin ıgerýdiń naqty ádistemesi júıelendi.
Budan bólek, depýtattar áskerı kadrlardy jáne joǵary áskerı oqý oryndarynyń professorlyq-oqytýshylar quramyn daıarlaý, oqý oryndarynyń materıaldyq bazasyn nyǵaıtý, áskerı-tehnıkalyq ázirlemelerge memlekettik tapsyrysty jetildirý máselelerin talqylady.
Óz sózinde Májilistiń Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev áskerı bilim júıesin mektepterdegi bastapqy áskerı daıarlyqtan bastap joǵary bilimge deıin jetildirý jaıyn qozǵady. Sondaı-aq, depýtat ǵylymı mekemelerdiń qazirgi zamanǵy materıaldyq-tehnıkalyq bazasyn qurý, ǵylymı-zertteý jáne tájirıbelik-konstrýktorlyq jumystardy qarjylandyrý qajettiligine toqtaldy.