Májilis komıteti ıadrolyq qaýipsizdikke qatysty tórt konventsııany talqylady
ASTANA. Qańtardyń 12-si. QazAqparat /Qanat Mámetqazyuly/ - Búgin QR Parlamenti Májilisi Halyqaralyq ister, qorǵanys jáne qaýipsizdik komıtetiniń keńeıtilgen otyrysynda depýtattar ıadrolyq qaýipsizdik máselelerin qamtıtyn tórt birdeı halyqaralyq konventsııany talqylady,
dep habarlaıdy QazAqparat.
Atalǵan konventsııalar - ıadrolyq qaýipsizdik týraly, ıadrolyq apattardy jedel habarlaý, ıadrolyq apat nemese radıatsııalyq apat jaǵdaıyndaǵy kómek kórsetý, paıdalanylǵan otynmen jumys isteý qaýipsizdigi sekildi máselelerdi qamtyp otyr. Bul zań jobalary Memleket basshysynyń 2007-2008 jyldardaǵy joldaýlaryn júzege asyrý sheńberinde ázirlengen.
«Búgingi kúni elimizdegi atom energetıkasynyń negizin qurý, ıadrolyq energetıka salasyn damytý baǵytynda birqatar belsendi sharalar atqarylýda. Osy rette usynylǵan halyqaralyq konventsııalardy ratıfıkatsııalaý ıadrolyq qyzmet qaýipsizdigi júıesiniń tıimdi jumys isteýine qajetti halyqaralyq standarttarǵa sáıkes negizgi quqyqtyq quraldardy engizýge baǵyttalady. Osynyń nátıjesinde atom energetıkasymen baılanysqan qyzmetterdi júzege asyrý, halyqty jáne qorshaǵan ortany qorǵaý deńgeıin kóterý sharalary qamtylady. Qujattar atom energetıkasyn beıbit paıdalaný salasyndaǵy Qazaqstannyń halyqaralyq yntymaqtastyǵynyń damýyna múmkindik beredi. Konventsııalarǵa qosylý atom energetıkasyn beıbit paıdalanýdaǵy birqatar úkimetaralyq kelisimderge qol qoıý úshin mindetti talap bolyp otyr», dedi konventsııalar boıynsha túsinik bergen Energetıka jáne mıneraldyq resýrstar vıtse-mınıstri Áset Maǵaýov.
Onyń aıtýynsha, Qazaqstan qazirgi kúni birqatar eldermen atom energetıkasy salasyndaǵy yntymaqtastyq boıynsha sharalar atqarýda. Biraq, bundaı yntymaqtastyqty júrgizý úshin aldymen joǵaryda keltirilgen konventsııalardy ratıfıkatsııalaý talap etiledi eken.
Zań jobalary palatanyń jalpy otyrysyna shyǵarylady.
