Májilis komıteti Úkimetke sý máselesimen aınalysatyn derbes organ qurýdy usyndy

ASTANA. QazAqparat – Májilistegi Úkimet saǵatynda Agrarlyq máseleler komıtetiniń tóraǵasy Serik Egizbaev sý máselesimen aınalysatyn derbes ortalyq memlekettik organ qurýdy usyndy, dep habarlaıdy QazAqparat tilshisi.

Depýtattyń aıtýynsha, Agrarlyq máseleler komıteti sý resýrstarynyń menedjmentine taldaý jasaǵan.

«Bizdiń baǵamyz boıynsha, sý resýrstaryn basqarý menedjmenti tıimsiz. Ekologııa mınıstrligi búkil salany óz betimen jiberdi dep esepteımiz», - dedi ol.

Agrarlyq máseleler komıtetiniń tóraǵasy bul másele fermerlerdi de qatty alańdatyp otyrǵanyn aıtady.

«Óńirlerge shyqqan kezde fermerler sý tapshylyǵy, sý qatynastarynyń rettemelgeni jáne sý sharýashylyq nysandarynyń tozýy sııaqty máselelerdi udaıy kóteredi.

Úkimetke sý máselesimen aınalysatyn derbes ortalyq memlekettik organ qurý máselesin qaıta qaraýdy usynamyz», - dedi Serik Egizbaev.