Májilis kólik máselesi boıynsha 4 kodeks pen 16 zańǵa ózgeris engizbek

NUR-SULTAN. QazAqparat – Májiliste «QR keıbir zańnamalyq aktilerine kólik máseleleri boıynsha ózgerister men tolyqtyrýlar engizý týraly» zań jobasy birinshi oqylymǵa shyǵaryldy, dep habarlaıdy QazAqparat tilshisi.

Zań jobasyn QR Indýstrııa jáne ınfraqurylymdyq damý mınıstri Qaıyrbek Óskenbaev Májiliste tanystyrdy.

Indýstrııa mınıstriniń aıtýynsha, qujat Qazaqstan Respýblıkasynyń 4 kodeksi jáne 16 zańyna ózgertýler men tolyqtyrýlar engizýdi kózdeıdi.

«Zań jobasynyń negizgi maqsattary: joldarda kóliktik baqylaýdy avtomattandyrý; teńiz kóligi salasyndaǵy halyqaralyq sharttardyń normalaryn ımplementatsııalaý; temirjol kóligindegi oqıǵalardy jáne kemelermen bolǵan avarııalyq jaǵdaılardy tergeý tártibin jetildirý; Qazaqstan Respýblıkasy zańnamasyn Halyqaralyq Azamattyq avıatsııa uıymy standarttarynyń talaptaryna jáne Eýropalyq Odaqtyń avıatsııalyq talaptaryna keltirý; áýeaılaq mańyndaǵy aýmaqta qyzmetti júzege asyrýǵa ruqsat alý tetigin retteý», - dep túsindirdi Qaıyrbek Óskenbaev.

Onyń aıtýynsha, júkti avtokólikpen tasymaldaýdyń joǵary qarqyny, jol tóseminiń merziminen buryn buzylý máselesi túbegeıli shara qabyldaýdy talap etedi.

Osy maqsatta «Nurly jol» baǵdarlamasy boıynsha jolda kólik quraldarynyń salmaqtyq jáne gabarıttik parametrlerin ólsheıtin avtomattandyrylǵan stansalardy ornatý josparlanǵan.

«Zań jobasynda avtomattandyrylǵan ólsheý stansalaryn ornatý jáne olardyń jumys tártibin aıqyndaıtyn normalar kózdelgen. Bul rette stansalar adamnyń qatysýynsyz «Sergek» júıesi qaǵıdaty boıynsha jumys isteıtinin atap ótken jón. Usynylyp otyrǵan sharalar avtojoldardyń saqtalýyn qamtamasyz etýge jáne kóliktik baqylaý júrgizý kezinde adamı faktordy boldyrmaýǵa múmkindik beredi», - dedi mınıstr.