Májilis Keden odaǵy sheńberindegi tehnıkalyq retteýdiń biryńǵaı qaǵıdattary týraly kelisimdi maquldady
ANA. 11 mamyr. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Belarýs Respýblıkasyndaǵy, Qazaqstan Respýblıkasyndaǵy jáne Reseı Federatsııasyndaǵy tehnıkalyq retteýdiń biryńǵaı qaǵıdattary men qaǵıdalary týraly kelisimdi ratıfıkatsııalaý týraly» zań jobasyn maquldady.
Atalǵan kelisimge 2010 jyly 18 qarashada Sankt-Peterbor qalasynda qol qoıylǵan bolatyn. Qujatqa sáıkes, Keden odaǵynyń tehnıkalyq reglamentteri keden odaǵynyń kedendik aýmaǵynda tikeleı qoldanylatyn bolady. Taraptar keden odaǵynyń tehnıkalyq reglamentteriniń talaptaryna sáıkes, keletin ónimniń aınalymyn óz aýmaǵynda keden odaǵynyń tehnıkalyq reglamentinde qamtylǵan osyndaı ónimge qatysty qosymsha talaptar qoımaı jáne qosymsha sáıkestikti baǵalaý rásimderin ótkizbeı qamtamasyz etetin bolady. «Jalpy, Kelisim Keden odaǵyna múshe memleketterdiń tehnıkalyq retteý júıesiniń úılesimdiligin qamtamsyz etýge baǵyttalyp, saýdadaǵy tehnıkalyq kedergilerdi joıýdy qarastyrady. Bul rette Keden odaǵynyń Komıssııasyna birqatar ókilettikter júkteıdi. Atap aıtqanda, Komıssııa tehnıkalyq reglamentter ázirleý jobasyn bekitedi, olardy qabyldaıdy. Tehnıkalyq reglamentpen ózara baılanysty bolyp tabylatyn standarttar tizimin bekitedi», - deıdi zań jobasy boıynsha baıandaǵan QR Indýstrııa jáne jańa tehnologııalar birinshi vıtse-mınıstri Albert Raý.
Kelisimniń 3-babyna sáıkes tehnıkalyq retteý salasynda keden odaǵynyń normatıvtik quqyqtyq bazasyn qalyptastyrý maqsatynda taraptar oǵan qatysty Keden odaǵy sheńberinde mindetti talaptar belgileıtin ónimderdiń biryńǵaı tizbesin qalyptastyrady. Bul rette taraptar óz zańnamasynda biryńǵaı tizbege engizilmegen ónimge qatysty mindetti talaptardy belgileýge jol bermeıdi.
Májilis maquldaǵan zań jobasy Parlament Senatyna jiberiledi.
