Májilis Keden odaǵy aıasynda keden qyzmetteriniń ókildigin qurýǵa arnalǵan zań jobasyn maquldady
ASTANA. 10 qazan. QazAqparat - Búgin QR Parlamenti Májilisiniń jalpy otyrysynda palata depýtattary «Eýrazııalyq ekonomıkalyq qoǵamdastyq sheńberinde Keden odaǵyna múshe memleketterdiń keden qyzmetteri ókildikteriniń qyzmeti máseleleri boıynsha keden isterindegi yntymaqtastyq jáne ózara kómek týraly kelisimdi ratıfıkatsııalaý týraly» zań jobasyn maquldady.
Kelisimge 2011 jyldyń 22 maýsymynda Máskeýde qol qoıylǵan. Qujatqa sáıkes, Keden odaǵyna múshe memleketter basqa taraptardyń aýmaǵynda keden qyzmetiniń ókildikterin qura alatyn bolady. Al ondaı keden qyzmetiniń ókildigi sol ókildik qurylǵan taraptyń zańnamasy negizinde áreket etedi. «Keden qyzmetiniń ókildigin onyń basshysy basqarady, sondaı-aq ol bolatyn eldiń keden qyzmeti alqasynyń múshesi bolyp tabylady», - deıdi Qarjy mınıstri Bolat Jámishev.
Zań jobasyna sáıkes, keden qyzmetteriniń ókildikterin qarjylandyrýdy ókildik etetin ár tarap ózderi júzege asyrady. Taraptar keden qyzmetiniń ókildigin óteýsiz, tepe-teń negizde qyzmettik úı-jaılarmen qamtamasyz etý jóninde mindettemeler qabyldaıdy.
