Májilis Qazaqstan men Reseıdiń áskerı yntymaqtastyǵyna qatysty qujatty qaraıdy

NUR-SULTAN. QazAqparat – Parlament Májilisi «Qazaqstan Respýblıkasy men Reseı Federatsııasy arasyndaǵy áskerı yntymaqtastyq týraly shartty ratıfıkatsııalaý týraly» zań jobasy boıynsha talqylaýdy bastaıdy, dep habarlaıdy QazAqparat tilshisi.

Atalǵan shart 2020 jyly 16 qazanda Nur-Sultan qalasynda jasaldy.

«Shartta memleketterdiń qaýipsizdigin qamtamasyz etý múddesinde áskerlerdi qoldanýdy birlesip josparlaýda jáne óńirlik qaýipsizdikke tónetin syn-qaterler men qaýipterge qarsy is-qımyl jasaýda áskerı yntymaqtastyqty júzege asyrý, sondaı-aq taraptardyń áskerı yntymaqtastyǵynyń basqa da baǵyttary boıynsha ózara is-qımyl jasaý kózdelip otyr. Komıtet osy zań jobasy boıynsha 2021 jylǵy 15 jeltoqsanǵa deıingi merzimde qorytyndy ázirleýge daıyn», - dedi Májilistiń Halyqaralyq ister, qorǵanys jáne qaýipsizdik komıtetiniń tóraıymy, depýtat Aıgúl Quspan palatanyń jalpy otyrysynda.

Sonymen qatar palata depýtattary «Táýelsiz Memleketter Dostastyǵyna qatysýshy memleketter qarýly kúshteriniń birlesken baılanys júıesi týraly kelisimdi ratıfıkatsııalaý týraly» zań jobasyn qaraıtyn bolady. Bul kelisim 2020 jyly 29 mamyrda jasaldy.

«Kelisimge sáıkes taraptar qujatqa qatysýshy memleketterdiń qarýly kúshteri arasyndaǵy ózara is-qımyldy damytý maqsatynda TMD-ǵa qatysýshy memleketter qarýly kúshteriniń birlesken baılanys júıesin qurady. Komıtet osy zań jobasy boıynsha 2021 jylǵy 15 jeltoqsanǵa deıingi merzimde qorytyndy ázirleýge daıyn», - dedi Aıgúl Quspan.